ലാഹോര്‍: പാകിസ്താനിലെ കസൂറില്‍ ഏഴുവയസുകാരി സൈനബിനെ പീഡിപ്പിച്ച് കൊലപ്പെടുത്തിയതുമായി ബന്ധപ്പെട്ട് പിടിയിലായയാള്‍ സീരിയല്‍ കൊലയാളിയെന്ന് സംശയം.
സൈനബിന്റെ വീടിന് സമീപത്ത് താമസിക്കുന്ന ഇംറാന്‍ അലി എന്നയാളാണ് പൊലിസ് പിടിയിലായത്. സൈനബിന്റെ കൊലപാതകത്തില്‍ കുറ്റം സമ്മതിച്ച ഇംറാന്‍ സമാനമായ നിരവധി കേസുകളിലും കുറ്റം സമ്മതിച്ചിട്ടുണ്ടെന്ന് പഞ്ചാബ് പ്രവിശ്യാ മുഖ്യമന്ത്രി ഷഹബാസ് ശരീഫ് പറഞ്ഞു. ഡി.എന്‍.എ പരിശോധനയിലെ തെളിവുകളും പ്രതിക്ക് എതിരാണ്. കാണാതായ ദിവസം ഒരാള്‍ക്കൊപ്പം സൈനബ് ശാന്തയായി നടന്ന് പോകുന്നതിന്റെ ദൃശ്യങ്ങള്‍ സി.സി.ടിവിയില്‍ നിന്ന് ലഭിച്ചിരുന്നു.
ഇതില്‍ നിന്നാണ് പരിചയമുള്ളയാളാണ് കൊലക്ക് പിന്നിലെന്ന് തെളിഞ്ഞത്. കൂടുതല്‍ ചോദ്യം ചെയ്യലിലാണ് നിരവധി പെണ്‍കുട്ടികളെ കൊലപ്പെടുത്തിയതായി ഇംറാന്‍ വെളിപ്പെടുത്തിയത്. പ്രതി കുറ്റസമ്മതം നടത്തിയതായി പൊലിസ് പറഞ്ഞു.