മട്ടന്നൂര്‍: കണ്ണൂര്‍ വിമാനത്താവളത്തിന്റെ പ്രവര്‍ത്തനത്തിന് വേണ്ട പ്രധാന പരിശോധനകളില്‍ ഒന്നായ നാവിഗേഷന്‍ ടെസ്റ്റ് വൈകുന്നു. ജനുവരി അവസാനവാരത്തിന് മുന്‍പ് നാവിഗേഷന്‍ ടെസ്റ്റ് നടത്താന്‍ എയര്‍പോര്‍ട്ട് അതോറിറ്റി തത്വത്തില്‍ തിരുമാനിച്ചതായിരുന്നുവെങ്കിലും ഈ മാസം നടക്കാന്‍ ഇടയില്ലെന്നാണ് വിവരം.
കിയാല്‍ അധികൃതര്‍ നാവിഗേഷന്‍ ടെസ്റ്റ് നടത്താന്‍ ആവശ്യമായ സൗകര്യങ്ങള്‍ ഒരുക്കി കാത്തിരിപ്പ് തുടങ്ങിയിട്ട് ഒരു മാസം കഴിയാറായി. ടെസ്റ്റിന് വേണ്ട വിമാനം ലഭ്യമായെങ്കിലും പൈലറ്റുമാരുടെ കുറവാണ് പരിശോധന വൈകാന്‍ കാരണമെന്നാണറിയുന്നത്. സ്വകാര്യ മേഖലയില്‍ നിന്നുള്ള പൈലറ്റുകള്‍ക്ക് ഇത്തരം ടെസ്റ്റുകള്‍ നടത്താന്‍ അനുമതിയില്ല. എവിയേഷന്‍ വകുപ്പിന്റെ കീഴിലുള്ള പൈലറ്റുമാര്‍ക്ക്് മാത്രമെ ടെസ്റ്റ് നടത്തുവാന്‍ അനുമതിയുള്ളൂ. ഇത്തരം പൈലറ്റുമാരുടെ എണ്ണം നാമമാത്രമാണ്.
അടുത്ത മാസം ആദ്യവാരത്തില്‍ നാവിഗേഷന്‍ ടെസ്റ്റ് നടത്താന്‍ കഴിയുമെന്ന പ്രതീക്ഷയിലാണ് കിയാല്‍ അധികൃതര്‍. നാവിഗേഷന്‍ ടെസ്റ്റിന് ശേഷം മാത്രമെ വിമാനത്താവളത്തിന് വേണ്ട ലൈസന്‍സിന് അപേക്ഷ നല്‍കുവാന്‍ കഴിയൂ.
പിന്നീടും നിരവധി പരിശോധനകള്‍ പൂര്‍ത്തീകരിച്ചിട്ടായിരിക്കും എയര്‍പോര്‍ട്ട് അതോറിറ്റി അംഗീകാരം നല്‍കുക. ഇതിന് ചുരുങ്ങിയത് മൂന്ന് മുതല്‍ ആറ് മാസം വരെ വേണ്ടി വരും.
പരിശോധനക്കായി ഡല്‍ഹിയില്‍ നിന്നെത്തുന്ന എയര്‍പോര്‍ട്ട് അതോറ്റിയുടെ പ്രത്യേക വിമാനം കരിപ്പൂര്‍ വിമാനത്താവളത്തില്‍ നിന്നാണ് കണ്ണൂരിലെത്തുക. റണ്‍വേയില്‍ ഇറക്കാതെ ആകാശത്ത് വട്ടമിട്ട് പറന്നാണ് പരിശോധന നടത്തുക. പദ്ധതി പ്രദേശത്ത് സ്ഥാപിച്ച ദിശയും ദൂരവും അളക്കുന്നതിനുള്ള ഉപകരണത്തിന്റെ പ്രവര്‍ത്തനവും പരിശോധിക്കും. ഒന്നരക്കോടിയിലേറെ രൂപ ചെലവഴിച്ചാണ് ഇത് സ്ഥാപിച്ചത്. പ്രത്യേക പരിശീലനം ലഭിച്ച പൈലറ്റുമാരാണ് വിമാനം പറത്തുക. വിമാനങ്ങള്‍ക്ക് തടസമുണ്ടാക്കുന്ന കെട്ടിടങ്ങള്‍ സംബന്ധിച്ചും പരിശോധന നടത്തും.