കോവളം: ഏറെക്കാലത്തെ കാത്തിരിപ്പിനൊടുവില്‍ വിഴിഞ്ഞം മത്സ്യബന്ധന തുറമുഖത്തെ പുതിയ വാര്‍ഫില്‍ വൈദ്യുതി വെളിച്ചമെത്തി. ഇന്നലെ ഇലക്ട്രിസിറ്റി കണക്ഷന്‍ ലഭിച്ചതോടെ  വൈകുന്നേരത്തോടെ വാര്‍ഫില്‍ നിര്‍മാണം പൂര്‍ത്തിയാക്കി മാസങ്ങളായി അടച്ചിട്ടിരുന്ന  ഗോഡൗണ്‍ പ്രകാശപൂരിതമായി. ഇത് അദാനി ഗ്രൂപ്പിന് വാടകയ്ക്ക് നല്‍കിയിരുന്നെങ്കിലും ഇലക്ടിസിറ്റി കണക്ഷന്‍ ഇല്ലാതിരുന്നതിനാല്‍ അവരും ഗോഡൗണ്‍ കാര്യമായി ഉപയോഗിക്കാതെ ഇട്ടിരിക്കുകയായിരുന്നു. വരുന്ന ഒരു മാസത്തിനുള്ളില്‍ കസ്റ്റംസ് ക്ലിയറന്‍സ് കൂടി കിട്ടുന്ന ഈ വാര്‍ഫും മത്സ്യബന്ധന തുറമുഖവും വികസനത്തിന്റെ പാതയിലാകുമെന്നാണ് പ്രതീക്ഷ.
വെളിച്ചമെത്തിയതോടെ  ആഡംബര കപ്പലുകളും ചരക്കു കപ്പലുകളുമൊക്കെ ഇനി പുതിയ വാര്‍ഫില്‍ നങ്കൂരമിടും. കൂറ്റന്‍ ചുറ്റുമതില്  ചാടിക്കടന്നെത്തിയിരുന്ന സാമൂഹ്യ വിരുദ്ധരും മദ്യപാനികളും അധികൃതര്‍ക്ക് എന്നും തലവേദനയായിരുന്നു. തീരസംരക്ഷണ സേനയുടെ കപ്പലുകളും തീരദേശ പൊലിസിന്റെ പട്രോള്‍ ബോട്ടുകളും മറൈന്‍ എന്‍ഫോഴ്‌സ്‌മെന്റിന്റെ ബോട്ടും ഉല്‍പ്പടെ സുരക്ഷാ ഏജന്‍സികള്‍ പിടിച്ചിട്ടിരിക്കുന്ന ഇറാനിയന്‍ പത്തേമാരി, ഗുജറാത്തി ടഗ്ഗ് എന്നിവയും അന്താരാഷ്ട്ര തുറമുഖനിര്‍മ്മാണവസ്തുക്കള്‍, അദാനിയുടെ വക ടഗ്ഗുകള്‍, ബാര്‍ജുകള്‍ തുടങ്ങി എല്ലാംനങ്കൂരമിട്ടിരുന്നത് സി വേഡ് എന്ന പുതിയ വാര്‍ഫിലാണെങ്കിലും നാളിതുവരെ രാത്രിയായാല്‍ അധികൃതര്‍ ഇരുളില്‍ തപ്പിത്തടയുകയായിരുന്നു. വൈദ്യുതി കണക്ഷനായി മുന്‍പ് നടന്ന പല ശ്രമങ്ങളും  സാങ്കേതിക കാരണങ്ങളുടെ പേരില്‍ പാതിവഴിയില്‍ ഉപേക്ഷിക്കുകയായിരുന്നു. വിഴിഞ്ഞം തുറമുഖത്ത് പുതിയതായി എത്തിയ പോര്‍ട്ട് ഓഫിസര്‍ അനിത എ.നായര്‍ വാര്‍ഫ് സൂപ്പര്‍വൈസര്‍ അനില്‍ എന്നിവരുടെയും വൈദ്യുത വകുപ്പിലെ ഉദ്യോഗസ്ഥരുടെയും ഒരു മാസത്തെ കൂട്ടായ പരിശ്രമമാണ് ഇന്നലെ ഫലം കണ്ടത്.
അദാനി ഗ്രൂപ്പ് ഒരു വര്‍ഷം മുന്‍പ് വടകക്കെടുത്ത ഗോഡൗണിന് വാടകയായി ഒരു രൂപ പോലും നല്‍കിയിരുന്നില്ല. വൈദ്യുതി എത്തിയതറിഞ്ഞ അദാനി ഗ്രൂപ്പുകാര്‍ കുടിശികയായ ഒരു ലക്ഷത്തി ഇരുപത്തെണ്ണായിരം രൂപ ഒരാഴ്ചക്കുള്ളില്‍ അടച്ച് തീര്‍ക്കാമെന്ന  അധികൃതര്‍ക്ക്  ഉറപ്പ് നല്‍കിയിരിക്കുകയാണ്. നിലവില്‍ വിഴിഞ്ഞം തുറമുഖത്തിന് കസ്റ്റംസ് ക്ലിയറന്‍സ് ഉണ്ടെങ്കിലും വാര്‍ഫുകളെ ലീവേഡ് എന്നും സീവേഡ് എന്ന് തിരിച്ചത് പുതിയ വാര്‍ഫിന് വിനയാവുകയായിരുന്നു. ഇത് പരിഹരിച്ച് ഇവിടെ വമ്പന്‍ കപ്പലടുക്കുന്നതിനുതകുന്ന കസ്റ്റംസ് ക്ലിയറന്‍സും ഒരു മാസത്തിനുള്ളില്‍ കിട്ടുമെന്നും അധികൃതര്‍ അറിയിച്ചു. നിലവില്‍ ക്ലിയറന്‍സുള്ള പഴയ വാര്‍ഫിന് സുരക്ഷയില്ലാത്തതും നീളക്കുറവും വലിയ കപ്പലടുപ്പിക്കുന്നതിന് തടസമായിരുന്നു. കസ്റ്റംസ് ക്ലിയറന്‍സ് കിട്ടുന്ന തോടെ മണലും കല്ലുമായുള്ള ചരക്ക് കപ്പല്‍ ഉടന്‍ വിഴിഞ്ഞത്തെ പുതിയ വാര്‍ഫിലടുക്കുമെന്നും അധികൃതര്‍ പറഞ്ഞു. വികസനത്തിന്റെ പാതയിലേക്ക് എത്തുന്ന പുതിയ വാര്‍ഫിനെ ബലപ്പെടുത്തുന്നതിനുള്ള നടപടികളും കഴിഞ്ഞ ദിവസം ആരംഭിച്ചിട്ടുണ്ട്.