ബംഗളൂരു: ചരിത്ര നേട്ടം സ്വന്തമാക്കി കേരള വനിതാ ക്രിക്കറ്റ് ടീം. സീനിയര്‍ ടി20 പോരാട്ടത്തിന്റെ പ്ലേറ്റ് വിഭാഗം ഫൈനലിലേക്ക് മുന്നേറിയാണ് കേരള വനിതാ ടീം നേട്ടത്തിലെത്തിയത്. സെമി പോരാട്ടത്തില്‍ ജാര്‍ഖണ്ഡിനെ 42 റണ്‍സിന് കീഴടക്കിയാണ് കേരള വനിതകള്‍ വിജയവും ഫൈനല്‍ ബര്‍ത്തും ഉറപ്പിച്ചത്.
ആദ്യം ബാറ്റ് ചെയ്ത കേരളം 20 ഓവറില്‍ ആറ് വിക്കറ്റ് നഷ്ടത്തില്‍ 132 റണ്‍സെടുത്തു. വിജയം തേടിയിറങ്ങിയ ജാര്‍ഖണ്ഡിന്റെ പോരാട്ടം 18.3 ഓവറില്‍ 90 റണ്‍സില്‍ അവസാനിപ്പിച്ചാണ് കേരളം മുന്നേറിയത്. നാളെ നടക്കുന്ന ഫൈനലില്‍ ഒഡിഷയാണ് കേരളത്തിന്റെ എതിരാളികള്‍.
ടോസ് നേടി ജാര്‍ഖണ്ഡ് കേരളത്തിനെ ബാറ്റിങിനയക്കുകയായിരുന്നു. 23 പന്തില്‍ 46 റണ്‍സെടുത്ത സജന എസ് ടീമിന്റെ ടോപ് സ്‌കോററായി. ഓപണര്‍ ഷാനി ടി (32), സഹ ഓപണര്‍ ജിന്‍സി ജോര്‍ജ് (22) എന്നിവരും ടീമിന് സംഭാവന നല്‍കി. വിജയത്തിലേക്ക് ബാറ്റേന്തിയ ജാര്‍ഖണ്ഡിനെ മൂന്ന് വീതം വിക്കറ്റുകള്‍ വീഴ്ത്തിയ ഷാനി ടി, കീര്‍ത്തി ജെയിംസ് എന്നിവരുടെ മികച്ച ബൗളിങിന്റെ പിന്‍ബലത്തില്‍ 90 റണ്‍സില്‍ ഓള്‍ ഔട്ടാക്കാന്‍ കേരളത്തിന് സാധിച്ചു. 32 റണ്‍സെടുത്ത ക്യാപ്റ്റന്‍ കവിത റോയിയാണ് ജാര്‍ഖണ്ഡ് നിരയില്‍ തിളങ്ങിയത്.