കക്കട്ടില്‍: അടുത്ത മാസം എട്ടിന് ആരംഭിക്കുന്ന എസ്.എസ്.എല്‍.സി പരീക്ഷയുടെ മാതൃകാപരീക്ഷ 13 ന് ആരംഭിക്കും. 21 ന് അവസാനിക്കും. ഐ.ടി മാതൃകാ പ്രായോഗിക പരീക്ഷ ഇതിനകം പൂര്‍ത്തിയായിട്ടുണ്ട്.    വിജയശതമാനം ഉയര്‍ത്തുന്നതിന് വേണ്ടി രാത്രി കാല ക്ലാസുകള്‍, സഹവാസ ക്യാംപുകള്‍, കൗണ്‍സലിങ് ക്ലാസുകള്‍, രക്ഷിതാക്കള്‍ക്കുള്ള ബോധവല്‍ക്കരണ പരിപാടികള്‍ എന്നിവയും വിദ്യാലയങ്ങളില്‍ പുരോഗമിക്കുകയാണ്.
   എല്ലാ വിഷയങ്ങള്‍ക്കും എ പ്ലസ്  നേടുന്ന  വിദ്യാര്‍ഥികളുടെ എണ്ണം കൂട്ടാനായി ചില സ്‌കൂളുകളില്‍ പ്രത്യേക പരിശീലനങ്ങളും നടന്നു വരുന്നുണ്ട്. സ്‌കൂളില്‍ തന്നെ വിദ്യാര്‍ഥികളെ പാര്‍പ്പിച്ച് രാത്രികാല ക്ലാസുകള്‍ പി.ടി.എയുടെ സഹകരണത്തോടെ സംഘടിപ്പിക്കുന്നുണ്ട്. ഇതിനിടയില്‍ ജില്ലാ പഞ്ചായത്തും വിജയശതമാനം ഉയര്‍ത്താനുള്ള പദ്ധതികള്‍ ആവിഷ്‌ക്കരിച്ചിട്ടുണ്ട്. പത്താം തരത്തിലെ പാഠപുസ്തകങ്ങള്‍ മാറിയതിനു ശേഷമുള്ള ആദ്യ പരീക്ഷയാണ് ഇത്തവണത്തേത്.