മലപ്പുറം: മുജാഹിദ് ഐക്യം രണ്ടു മാസം തികയും മുന്‍പേ സംഘടനയില്‍ വീണ്ടും ആശയകലാപം. ഐക്യത്തിനിടെയും നീറിപ്പുകഞ്ഞ സിഹ്‌റ് (മാരണം) വിവാദം പുതിയ തലത്തിലേക്കെത്തി.  കഴിഞ്ഞ ആഴ്ച ഇറങ്ങിയ കെ.എന്‍.എം മുഖപത്രം വിചിന്തനം വാരികയിലെ 'ഒരു വിശദീകരണം'എന്ന വിവാദ ലേഖനത്തിന് മറുപടിയുമായി  മടവൂര്‍ വിഭാഗം മുഖപത്രമായ ശബാബ് വാരിക പുതിയ ലക്കം പുറത്തിറങ്ങിയതോടെയാണ് ആശയകലാപം രൂക്ഷമായത്.
സിഹ്‌റ് ബാധിക്കുമെന്ന അര്‍ഥത്തില്‍ വിചിന്തനത്തില്‍ എ. അസ്ഗറലിയുടേയും എം. അബ്ദുറഹിമാന്‍ സലഫിയുടേയും പേരില്‍ വന്ന ലേഖനത്തിനാണ് 'സിഹ്‌റും വിവാദങ്ങളും' എന്ന തലക്കെട്ടില്‍ ഈ ലക്കം ശബാബ് വാരിക മറുപടി പ്രസിദ്ധീകരിച്ചത്. ഇരുപക്ഷത്തേയും ലയനകാര്യങ്ങള്‍ക്ക് നേതൃത്വം നല്‍കിയ അബ്ദുറഹ്മാന്‍ സലഫിയും എ. അസ്ഗറലിയും ചേര്‍ന്നെഴുതിയ വിചിന്തനത്തിലെ ലേഖനത്തെ തുടര്‍ന്ന്   കെ.എന്‍.എം സംഘടനാകാര്യ ചുമതലയുള്ള സെക്രട്ടറി അസ്ഗറലി നേതൃത്വത്തിന് രാജി സമര്‍പ്പിച്ചിരുന്നു.
സിഹ്‌റ് അന്ധവിശ്വാസമാണെന്നും ഫലസിദ്ധിയില്ലെന്നുമെന്ന രീതിയില്‍  1982ല്‍ കെ.എന്‍.എമ്മിന്റെ ഔദ്യോഗിക പ്രസിദ്ധീകരണമായ അല്‍മനാറില്‍  എഡിറ്ററായിരുന്ന മൂസ വാണിമേല്‍ എഴുതിയ ലേഖനമാണ്  ഈ ലക്കം ശബാബ് വാരിക നേതൃത്വത്തിനു മറുപടിയായി പുനഃപ്രസിദ്ധീകരിച്ചിരിക്കുന്നത്. കാര്യകാരണ ബന്ധങ്ങള്‍ക്ക് അതീതമായി നന്‍മ  ചെയ്യാനോ തിന്‍മ ചെയ്യാനോ അല്ലാഹുവിനു മാത്രമേ കഴിയൂ. അതുകൊണ്ട് സിഹ്‌റ് എന്ന ഒന്നില്ലെന്നും, ഉണ്ടെന്നും ഫലിക്കുമെന്നും വിശ്വസിക്കല്‍ ശിര്‍ക്ക് (ബഹുദൈവ വിശ്വാസം) ആണെന്നും ലേഖനത്തില്‍  പറയുന്നു.
സിഹ്‌റ് ബാധിക്കുമോ എന്ന കാര്യത്തില്‍ മുജാഹിദ് പണ്ഡിതസഭയായ കേരള ജംഇയ്യത്തുല്‍ ഉലമ തീരുമാനം എടുക്കുന്നത് വരെ ഇക്കാര്യം പൊതുവേദികളില്‍ ചര്‍ച്ചയാക്കരുതെന്നായിരുന്നു ഇരുവിഭാഗവും തമ്മില്‍ ഐക്യസമയത്തുണ്ടായിരുന്ന ധാരണ.
ഇതിനു വിരുദ്ധമാണ് വിചിന്തനത്തില്‍ രണ്ടു സംഘടനകാര്യ സെക്രട്ടറിമാരുടെ പേരില്‍ സിഹ്‌റ് ഫലിക്കുമെന്ന പേരില്‍ ലേഖനം വന്നതെന്നാണ് ഒരുവിഭാഗത്തിന്റെ ആക്ഷേപം. ഇതിനെതിരേ പുതിയ ലേഖനമെന്നതിനു പകരം മുന്‍ യോജിപ്പു കാലത്ത് അല്‍മനാര്‍ കൊടുത്ത ലേഖനം തന്നെ പുനര്‍ വായനക്കു നല്‍കിയാണ് ആശയപോരാട്ടത്തിനു മടവൂര്‍ വിഭാഗവും രംഗത്തിറങ്ങിയത്.
ഐക്യ ധാരണയനുസരിച്ച് ഇരുപക്ഷത്തുമുണ്ടായിരുന്ന പ്രസിദ്ധീകരണങ്ങള്‍ അതേപടി തുടരണമെന്നായിരുന്നു തീരുമാനം. ഔദ്യോഗിക വിഭാഗം അല്‍മനാര്‍, വിചിന്തനം എന്നിവയും മടവൂര്‍ വിഭാഗം  അത്തൗഹീദ്,ശബാബ്, പുടവ എന്നിവയുമാണ് തുടരുന്നത്.  കഴിഞ്ഞ ഡിസംബറിലാണ്  കോഴിക്കോട്ട് ഇരുവിഭാഗം മുജാഹിദുകളും  ഐക്യസമ്മേളനം നടത്തിയത്. എന്നാല്‍ 2002ല്‍   ആശയപരമായ വിഷയങ്ങളുടെ പേരില്‍ പിളര്‍ന്ന മുജാഹിദിലെ ഇരുവിഭാഗവും ചേരിതിരിഞ്ഞു വര്‍ഷങ്ങളോളം ഖണ്ഡനങ്ങള്‍ നടത്തിയിരുന്ന അടിസ്ഥാന വിഷയങ്ങളെകുറിച്ച് ഭാവി നിലപാട് എന്തായിരിക്കണമെന്ന് ഐക്യ സമയത്ത് വ്യക്തമാക്കിയിരുന്നില്ല. കെ.എന്‍.എം ഔദ്യോഗിക വിഭാഗത്തില്‍ നിന്ന് 35 പേരും മടവൂര്‍ വിഭാഗത്തില്‍ നിന്ന് 15 പേരും ഉള്‍പ്പെടെ 50 അംഗ എക്‌സിക്യൂട്ടിവിന് ഐക്യ സമ്മേളനം രൂപംനല്‍കി  രണ്ടുമാസം പിന്നിടുമ്പോഴും ഇതുവരെ ഈ സമിതി യോഗവും ചേര്‍ന്നിട്ടില്ല. പ്രസിഡന്റ് ടി.പി അബ്ദുല്ലക്കോയ മദനിയും പ്രധാന നേതാവ് ഡോ.ഹുസൈന്‍ മടവൂരും വിദേശ പര്യടനത്തിലായിരിക്കെയാണ് കെ.എന്‍.എമ്മില്‍ വീണ്ടും ആശയപോരാട്ടം മറനീക്കി പുറത്തുവന്നത്.