തൃശൂര്‍: എഴുത്തുകാരന്‍ കമല്‍ സി ചവറ സാഹിത്യ അക്കാദമിക്ക് മുന്നില്‍ നടത്തിയിരുന്ന പട്ടിണി സമരം പിന്‍വലിച്ചു. കമല്‍ സിക്കെതിരേ ചുമത്തിയ രാജ്യദ്രോഹ കുറ്റം പിന്‍വലിക്കാമെന്ന് സി.പി.എം പോളിറ്റ് ബ്യൂറോ അംഗം എം.എ ബേബി സമര പന്തലില്‍ എത്തി ഉറപ്പ് നല്‍കിയതിനെ തുടര്‍ന്നാണ് സമരം പിന്‍വലിച്ചത്.
പ്രശ്‌നം സര്‍ക്കാരിന്റെ ശ്രദ്ധയില്‍പെടുത്തിയിട്ടുണ്ടെന്നും കോടതിയില്‍ കമല്‍ സി ചവറക്ക്  അനൂകൂലമായ റിപ്പോര്‍ട്ട് നല്‍കി നിയമനടപടികള്‍ അവസാനിപ്പിക്കുമെന്നും എം.എ ബേബി പറഞ്ഞു.
സര്‍ക്കാരിന്റെ താല്‍പര്യത്തിന് വിപരീതമായാണ് ചില ഉദ്യോഗസ്ഥര്‍ പ്രവര്‍ത്തിക്കുന്നതെന്ന് ബേബി പറഞ്ഞു. സി.പി.എം ജില്ലാ സെക്രട്ടറി കെ രാധാകൃഷ്ണന്‍, എന്‍.ആര്‍ ഗ്രാമപ്രകാശ് എന്നിവരും ബേബിക്കൊപ്പം ഉണ്ടായിരുന്നു. കമല്‍ സി ചവറക്ക്  എം.എ ബേബി നാരങ്ങ നീര് നല്‍കി സമരം അവസാനിപ്പിച്ചു.
തന്റെ പ്രധാന ആവശ്യങ്ങള്‍ അംഗീകരിച്ചതിന്റെ അടിസ്ഥാനത്തിലാണ് സമരം അവസാനിപ്പിച്ചതെന്ന് കമല്‍ സി ചവറ പറഞ്ഞു. തനിക്കും നദീറിനും എതിരായ കേസുകള്‍ പിന്‍വലിക്കാമെന്ന് ബേബി ഉറപ്പ് നല്‍കിയിട്ടുണ്ട്. എന്നാല്‍ യു.എ.പി.എ കേസുകള്‍ സംബന്ധിച്ച് സി.പി.എമ്മിന് ഇപ്പോഴും വ്യക്തമായ നിലപാടില്ല. യു.എ.പി.എ ദുരുപയോഗം തടയുമെന്ന് മാത്രമാണ് സി.പി.എം നേതാക്കള്‍ ഇപ്പോഴും പറഞ്ഞുകൊണ്ടിരിക്കുന്നത്. അഥവാ,   സി.പി.എം നേതാക്കള്‍ക്കെതിരേ യു.എ.പി.എ ചുമത്തില്ലെന്നാണ് അതിന്റെ അര്‍ത്ഥം. യു.എ.പി.എ പോലുള്ള കരിനിയമങ്ങള്‍ പൂര്‍ണമായി പിന്‍വലിക്കുകയാണ് വേണ്ടത്. അതിനെതിരായ സമരങ്ങളില്‍ തുടര്‍ന്നും പങ്കാളിയാകുമെന്നും കമല്‍ സി ചവറ പറഞ്ഞു.