മരട് (കൊച്ചി): രാത്രിയില്‍ വീട്ടില്‍ കയറി വീട്ടമ്മയെ തോക്ക് ചൂണ്ടി ഭീഷണിപ്പെടുത്തി മാനഭംഗത്തിനു ശ്രമിക്കുകയും വീട്ടിലെ ടിവി, എല്‍.സി.സി.എന്നിവ മോഷ്ടിക്കുകയും ചെയ്ത കേസിലെ പ്രതി  പിടിയില്‍. കൊല്ലം മൈനാഗപ്പള്ളി കല്ലുവെട്ടാംകുഴി തെക്കേതില്‍ ശശിധരന്റെ മകന്‍ അരുണാ(29)ണു മരട് പൊലിസിന്റെ പിടിയിലായത്.  
കഴിഞ്ഞ മാസം 29നാണു കേസിനാസ്പദമായ സംഭവം.  ഇതേത്തുടര്‍ന്ന് പ്രതി  വിവിധ സ്ഥലങ്ങളില്‍ ഒളിവില്‍ കഴിയുകയായിരുന്നു. കരുനാഗപ്പള്ളിയില്‍ നിന്നാണ് ഇയാളെ പൊലിസ് അറസ്റ്റ് ചെയ്തത്. രണ്ടാം പ്രതി നാസറിനെ ഇനിയും പിടികൂടാനായിട്ടില്ല. ഇയാള്‍ കൊല്ലം ജില്ലയില്‍ നിരവധി കേസുകളില്‍ പ്രതിയാണ്.
സൗത്ത് സി.ഐ സിബി ടോം, മരട് എസ്.ഐ സുജാതന്‍ പിള്ള, സി.പി.ഒ മാരായ ഗിരീഷ് ബാബു, വിനോദ് കൃഷ്ണ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ ഇയാളെ 14 ദിവസത്തേക്ക് റിമാന്‍ഡ് ചെയ്തു.