വടക്കഞ്ചേരി: പുതിയ പിണറായി വിജയന്‍ മന്ത്രിസഭയില്‍ പാലക്കാടിന്റെ പ്രാതിനിധ്യം കുറഞ്ഞതായി പരാതി. മുഖ്യമന്ത്രിയായും പ്രതിപക്ഷനേതാവായും മറ്റു പ്രമുഖ വകുപ്പു മന്ത്രിമാരുമൊക്കെയായി വലിയ പ്രാതിനിധ്യം ഉണ്ടാകാറുള്ള പാലക്കാടിന് ഇക്കുറി മതിയായ പരിഗണന ലഭിച്ചില്ലെന്നാണ് കരുതേണ്ടത്. മുന്‍പ് വൈദ്യുതി മന്ത്രിയായിരുന്ന എ.കെ ബാലന്‍ മന്ത്രിയായി എന്നതു മാത്രമാണ് എടുത്തു പറയാനുള്ളത്. അത്ര വലിയ വകുപ്പുകളൊന്നും എ.കെ ബാലനു നല്‍കിയിട്ടുമില്ല.
സമീപ ജില്ലയായ തൃശൂരില്‍ നിന്നും മൂന്നു പ്രമുഖ മന്ത്രിമാര്‍ ഉള്ളപ്പോള്‍ ഇടതിന്റെ പാരമ്പര്യ കോട്ടയായ പാലക്കാടിന്റെ പകിട്ട് മങ്ങുകയായിരുന്നുവെന്ന് ചൂണ്ടിക്കാട്ടുന്നു. നിയമ-സാംസ്‌കാരിക പട്ടികജാതി- വര്‍ഗ പിന്നോക്ക ക്ഷേമവകുപ്പാണ് ബാലനു നല്‍കിയിട്ടുള്ളത്. സമ്പൂര്‍ണ വൈദ്യുതീകരണ മണ്ഡലങ്ങളാക്കി മാറ്റി കഴിഞ്ഞ തവണ ശ്രദ്ധേയമായ പ്രവര്‍ത്തനമായിരുന്നു എ.കെ ബാലന്റേത്.
പാര്‍ട്ടിയിലും പ്രബലനാണ് എ.കെ.ബാലന്‍. എന്നാല്‍ തനിക്ക് ഇക്കുറി കൂടുതല്‍ വകുപ്പുകളുണ്ടെന്നാണ് മന്ത്രി എ.കെ ബാലന്‍ കഴിഞ്ഞ ദിവസം വടക്കഞ്ചേരിയില്‍ നല്‍കിയ സ്വീകരണയോഗത്തില്‍ പറഞ്ഞത്. കഴിഞ്ഞ എല്‍.ഡി.എഫ് മന്ത്രിസഭയില്‍ വൈദ്യുതിവകുപ്പും പട്ടികജാതി-വര്‍ഗ വകുപ്പും ഉണ്ടായിരുന്നത് ഇപ്പോള്‍ നിയമവും സാംസ്‌കാരിക വകുപ്പും പട്ടികജാതി-വര്‍ഗ പിന്നോക്ക ക്ഷേമവകുപ്പുമായി മാറി.
സാംസ്‌കാരിക വകുപ്പ് അത്ര എളുപ്പമുള്ളതല്ല. അഭിപ്രായം കൂടുതല്‍ വരുന്നതാണ് സിനിമ. സിനിമ കാണാന്‍ പോകാത്ത തനിക്ക് സിനിമയും കൈകാര്യം ചെയ്യണമെന്നാണ് മന്ത്രി ബാലന്‍ പറഞ്ഞത്.