കുറ്റ്യാടി: പുതിയ ബസ് സ്റ്റാന്‍ഡ് ഗതാഗതത്തിനു തുറന്നുകൊടുത്ത് മാസങ്ങള്‍ പിന്നിട്ടിട്ടും ടാറിങ് പ്രവൃത്തി അനിശ്ചിതമായി നീളുന്നത് യാത്രക്കാര്‍ക്ക് ദുരിതമാവുന്നു.
രൂക്ഷമായ പൊടിശല്യം കാരണം സ്റ്റാന്‍ഡില്‍ നില്‍ക്കാന്‍ പോലും കഴിയാത്ത സ്ഥിതിയാണ്. ബസുകള്‍ കയറിത്തുടങ്ങിയതോടെ ഇളകിനില്‍ക്കുന്ന മെറ്റലുകള്‍ തെറിച്ച് യാത്രക്കാര്‍ക്ക് പരുക്കേല്‍ക്കുന്നതും പതിവാണ്.
ഏറെകാലത്തെ പ്രതിഷേധങ്ങള്‍ക്കൊടുവില്‍ കഴിഞ്ഞ ഒക്ടോബറിലാണ് സ്റ്റാന്‍ഡില്‍ ബസുകള്‍ കയറിത്തുടങ്ങിയത്. മൂന്നു മാസംകൊണ്ട് മെറ്റല്‍ ചെയ്ത് സ്റ്റാന്‍ഡിന്റെ പണി പൂര്‍ത്തീകരിക്കുമെന്നായിരുന്നു അന്ന് പഞ്ചായത്ത് അധികൃതര്‍ പറഞ്ഞത്.
ഇതിനായി ഈ വര്‍ഷത്തെ ഫണ്ടില്‍ തുക വകയിരുത്തിയിട്ടുണ്ടെന്നും പറഞ്ഞിരുന്നു.
എന്നാല്‍ ഈ സാമ്പത്തികവര്‍ഷം അവസാനിക്കാന്‍ ഒന്നരമാസം മാത്രം ശേഷിച്ചിട്ടും ഇതുവരെ സ്റ്റാന്‍ഡിന്റെ നിര്‍മാണം പൂര്‍ത്തീകരിക്കാന്‍ നടപടിയായിട്ടില്ല.
അതേസമയം സ്റ്റാന്‍ഡ് നിര്‍മാണ സമയത്ത് ഓവുചാല്‍ നിര്‍മാണം നടന്നിരുന്നില്ല. ഓവുചാല്‍ നിര്‍മാണത്തിന്റെ എസ്റ്റിമേറ്റ് കൂടി ഉള്‍പ്പെടുത്തി നിലവിലുള്ള എസ്റ്റിമേറ്റ് പുതുക്കേണ്ടി വന്നതാണ് ടാറിങ് പ്രവൃത്തി വൈകുന്നതിന് ഇടയാക്കുന്നതെന്ന് അറിയുന്നു.
സ്റ്റാന്‍ഡില്‍ നിര്‍മാണ സമയത്ത് പാകിയ ടൈലുകളെല്ലാം പൊട്ടിപ്പൊളിഞ്ഞ നിലയിലാണ്. മെറ്റല്‍ ചെയ്യാത്തതിനാല്‍ കച്ചവടസ്ഥാപനങ്ങളും ഇതുവരെ തുറന്നു പ്രവര്‍ത്തിക്കാന്‍ തുടങ്ങിയിട്ടില്ല. ടാറിങ് പൂര്‍ത്തീകരിച്ച് യാത്രക്കാര്‍ക്കാവശ്യമായ സൗകര്യമൊരുക്കാന്‍ അടിയന്തര നടപടിവേണമെന്ന ആവശ്യം ശക്തമായിട്ടുണ്ട്.