കണ്ണൂര്‍: മുഖ്യമന്ത്രിയുടെ ജനസമ്പര്‍ക്ക പരിപാടി നാളെ കലക്ടറേറ്റില്‍ നടക്കും. പരാതികളില്‍ എല്ലാ വകുപ്പുകളിലെയും ജില്ലാ മേധാവികള്‍ പങ്കെടുത്ത് തീര്‍പ്പാക്കും. ജില്ലയില്‍ 2813 അപേക്ഷയാണ് ലഭിച്ചത്. ഇതില്‍ 2009 അപേക്ഷകളും ചികിത്സാ ധനസഹായത്തിനുള്ളതാണ്. ഭവന നിര്‍മാണം 338, സാമൂഹ്യ നീതി വകുപ്പുമായി ബന്ധപ്പെട്ടവ 58, റേഷന്‍ കാര്‍ഡ് 42, കോര്‍പറേഷന്‍ പരിധിയിലെ താമസക്കാരായവരുടെ വീടിനുള്ള പ്രത്യേക അപേക്ഷ 109 എന്നിങ്ങനെയാണ് ആകെ ലഭിച്ച അപേക്ഷകള്‍. പുതിയ അപേക്ഷകളുും സ്വീകരിക്കും. ഓരോ താലൂക്കിനും ഒന്ന് എന്ന നിലയില്‍ നാലു കൗണ്ടറുകളുണ്ടാകും. കലക്ടറുടെ നേതൃത്വത്തില്‍ ജില്ലാ ഉദ്യോഗസ്ഥരും വില്ലേജ് ഓഫിസര്‍മാരെ വരയെുള്ളവരും പരാതികള്‍ കൈകാര്യം ചെയ്യും.
കൗണ്ടറുകളില്‍ നിന്ന് ലഭിക്കുന്ന മറുപടി തൃപ്തികരമല്ലെങ്കില്‍ കലക്ടറെ നേരില്‍ കണ്ട് പരാതി അറിയിക്കാവുന്നതാണ്.  നേരത്തെ അനുവദിച്ച ചികിത്സാ സഹായവും വിതരണം ചെയ്യും. പൊടിക്കുണ്ട് സ്‌ഫോടനത്തില്‍ 80 പേര്‍ക്കായി ഒരു കോടിയിലേറെ രൂപ നഷ്ടപരിഹാരം അനുവദിച്ചിട്ടുണ്ട്. ഈ തുകയും കൈമാറും.നിലവിലുള്ള ഉദ്യോഗസ്ഥരെ ഉപയോഗപ്പെടുത്തിയാണ് ജനസമ്പര്‍ക്ക പരിപാടി സംഘടിപ്പിച്ചിട്ടുള്ളത്. കിടപ്പ് രോഗികള്‍ നേരിട്ട് വരേണ്ടതില്ലെന്നും അറിയിച്ചിട്ടുണ്ട്.