കുമ്പള: ഷിറിയ പുഴയില്‍ നിന്നും വ്യാപകമായി അനധികൃത മണലെടുപ്പ് സജീവമായതോടെ കുമ്പള, കാസര്‍കോട് പൊലിസ് നടത്തിയ സംയുക്ത പരിശോധനയില്‍ അനധികൃത മണല്‍ കടത്തിനുപയോഗിച്ച എട്ടുതോണികള്‍ പിടികൂടി തകര്‍ത്തു.
ഇന്നലെ ഉച്ചയോടെ കുമ്പള സി.ഐ. വി.വി മനോജ് കാസര്‍കോട് സി.ഐ അബ്ദുല്‍ റഹീം എന്നിവര്‍ സംയുക്തമായി നടത്തിയ തെരച്ചലിലാണ് അനധികൃത കടവുകളും കടത്തിനുപയോഗിച്ച തോണികളും കണ്ടെത്തിയത്. ഷിറിയ പുഴയിലെ ഉളുവാറില്‍ നിന്ന് മൂന്നും ഇച്ചിലങ്കോട് കല്‍പാറ കടവുകളില്‍ നിന്ന് അഞ്ചുതോണിയും കണ്ടെടുത്തു. ഉളുവാര്‍ കടവിലെത്തിച്ച തോണികള്‍ മണ്ണുമാന്തി യന്ത്രം ഉപയോഗിച്ചാണ് പൊലിസ് തകര്‍ത്തത്. എസ്‌കോര്‍ട്ടിന് ആളെ നിര്‍ത്തിയും നോക്ക് കൂലി നല്‍കിയും അനധികൃത മണല്‍ കടത്ത് സജീവമാണെന്ന് നേരത്തെ പരാതി ഉണ്ടായിരുന്നു. രാവിലെ എട്ടുമുതല്‍ രണ്ടുവരെയാണ് അധികൃത മണല്‍ കടത്തിന് അനുമതി നല്‍കിയത്.
എന്നാല്‍ മാഫിയാ സംഘം രാത്രി കാലങ്ങളില്‍ ഇതര സംസ്ഥാന തൊഴിലാളികളെ ഉപയോഗിച്ച് മണല്‍ ശേഖരിക്കുകയും ശേഷം പുലര്‍ച്ചേ നാലുമുതല്‍ ഏഴുവരെ ഉടുവഴികളിലൂടെ ലക്ഷ്യസ്ഥാനത്ത് എത്തിക്കുകയുമാണ് പതിവ്.