തേഞ്ഞിപ്പലം: 'തണല്‍' ചേളാരിക്ക് ദേശീയ തലത്തില്‍ പ്രവര്‍ത്തിക്കാനുള്ള അനുമതി ലഭിച്ചതായി ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ചേളാരി 'തണല്‍'  ഇന്ത്യ ഫൗണ്ടേഷന്‍ എന്ന പേരിലാണ് അനുമതി ലഭിച്ചിട്ടുള്ളത്.
15 വര്‍ഷമായി വിവിധ മേഖലകളില്‍ പ്രവര്‍ത്തിച്ച ശേഷമാണ് ദേശീയതലത്തിലേക്കും 'തണല്‍'  പ്രവര്‍ത്തനം വ്യാപിപ്പിക്കുന്നത്. സ്വയം തൊഴില്‍,ഓര്‍ഗാനിക്ക് ഫാമിങ് തുടങ്ങി അഞ്ചിലേറെ മേഖലകളില്‍ കാംപയില്‍ ചെയ്യുവാനും നടത്തികൊണ്ടുപോകുവാനും ആര്‍ട്‌സ്, സ്‌പോട്‌സ് ക്ലബുകള്‍, യുവജന സംഘടനകള്‍, ത്രിതല പഞ്ചായത്തുകള്‍ എന്നിവയുമായി സഹകരിച്ച് പ്രവര്‍ത്തിക്കുവാനുമാണ് അനുമതിയായത്. കോഴിക്കോട് മെഡിക്കല്‍ കോളജില്‍ പ്രവര്‍ത്തിക്കുന്ന പെയിന്‍ ആന്‍ഡ് പാലിയേറ്റീവ് കോംപ്ലക്‌സില്‍ തണല്‍ നിര്‍മിച്ചു നല്‍കിയ പൂന്തോട്ടം കൈമാറല്‍ ജില്ലാ അസി.കലക്ടര്‍ ഇമ്പശേഖരന്‍ നിര്‍വഹിച്ചു. 95000 രൂപ മുടക്കിയാണ് കോംപ്ലക്‌സിന്റെ പ്രവേശന കവാടത്തില്‍ പൂന്തോട്ടം ഒരുക്കിയിട്ടുള്ളതെന്നും ഭാരവാഹികള്‍ പറഞ്ഞു.
വാര്‍ത്താസമ്മേളനത്തില്‍ തണല്‍ ചെയര്‍മാന്‍ പി.എം മുഹമ്മദലി ബാബു, പി.വി അബൂബക്കര്‍, ജലീല്‍ ചേളാരി പങ്കെടുത്തു.