മഞ്ചേരി: അരീക്കോട് കീഴുപറമ്പ് കുഞ്ഞന്‍പടിയില്‍വച്ചു ബൈക്ക് യാത്രക്കാരനെ ഇടിച്ചുവീഴ്ത്തി ഏഴു ലക്ഷം രൂപ കവര്‍ന്ന കേസിലെ അവസാന പ്രതിയും പിടിയിലായി. തൃശൂര്‍ പഴുക്കര വേഴപറമ്പില്‍ ജിജോ ജോസ് (34) ആണ് ഇന്നലെ മഞ്ചേരി പൊലിസിന്റെ പിടിയിലായത്.
2011 ഓഗസ്റ്റ് മൂന്നിനാണ് കേസിനാസ്പദമായ സംഭവം നടന്നത്. കൊടുവള്ളിയിലെ ജ്വല്ലറിയിലേക്കു പണവുമായി പോവുകയായിരുന്ന കൊടുവള്ളി തൊള്ളറമ്മല്‍ അബ്ദുസലീമിനെ കാറിലെത്തിയ പ്രതി ഉള്‍പ്പെടെയുള്ള പതിനൊന്നംഗ സംഘം ഇടിച്ചുതെറിപ്പിച്ച് വാഹനത്തില്‍ കയറ്റിക്കൊണ്ടുപോയി പണം കവര്‍ച്ച നടത്തുകയായിരുന്നു. ശേഷം സലീമിനെ പ്രതികള്‍ റോഡില്‍ ഉപേക്ഷിച്ചു. കോട്ടക്കല്‍ ഭാഗത്തേക്കാണ് കവര്‍ച്ചാ സംഘം പോയതെന്ന വിവരത്തിന്റെ അടിസ്ഥാനത്തില്‍ പൊലിസ് അന്വേഷണം ശക്തമാക്കി.
തുടര്‍ന്നു കോട്ടക്കലില്‍വച്ച് പ്രതികള്‍ സഞ്ചരിച്ച വാഹനം തടയാന്‍ ശ്രമിച്ചങ്കിലും പൊലിസ് വാഹനത്തെ ഇടിച്ചുതെറിപ്പിച്ചു കടന്നുകളയുകയായിരുന്നു. ഈ സംഭവത്തില്‍ പ്രതികള്‍ക്കെതിരേ കോട്ടക്കല്‍ സ്‌റ്റേഷനിലും കേസുണ്ട്. ഒരു മാസം മുന്‍പ് ഈ കേസില്‍ തൃശൂര്‍ സ്വദേശികളായ കല്ലൂര്‍ ബിനീഷ്, ആലങ്ങാട് പഴംപള്ളി സിനോഷ് എന്നിവരെ പ്രത്യേക അന്വേഷണ സംഘം പിടികൂടുകയും ചെയ്തിരുന്നു. പിടികൂടിയ പ്രതികളില്‍നിന്ന് അഞ്ചുലക്ഷം രൂപ പിടിച്ചെടുക്കുകയും ചെയ്തു. മഞ്ചേരി എസ്.ഐ കൈലാസ്‌നാഥും പ്രത്യേക അന്വേഷണ സംഘമായ ഉണ്ണികൃഷ്ണന്‍ മാരാത്ത്, പി. സഞ്ജീവ്, ടി. ശ്രീകുമാര്‍, സലീം, സജയന്‍ എന്നിവരാണ് പ്രതിയെ അറസ്റ്റ് ചെയ്തത്.