ചെന്നൈ: കമല്‍ ഹാസന്റെ തമിഴ്‌നാട് പര്യടനത്തിന് നാളൈ നമത്(നാളെ നമ്മുടേത്) എന്ന് പേരിട്ടു. അടുത്ത മാസം 21ന് രാമനാഥപുരത്ത് രാഷ്ട്രീയ പാര്‍ട്ടി പ്രഖ്യാപിക്കാനിരിക്കുകയാണ് കമല്‍ ഹാസന്‍. മുന്‍മുഖ്യമന്ത്രിയും അണ്ണാ ഡി.എം.കെ സ്ഥാപകനുമായ എം.ജി.ആര്‍ നായകനായി 1975ല്‍ പുറത്തിറങ്ങിയ ചിത്രമാണ് നാളൈ നമത്. ചിത്രം തിയറ്ററുകളില്‍ എത്തി രണ്ടുവര്‍ഷത്തിനു ശേഷം എം.ജി.ആര്‍ തമിഴ്‌നാട് മുഖ്യമന്ത്രിയാകുകയും ചെയ്തു. തമിഴ് ഗ്രാമങ്ങളിലൂടെയാണ് രാഷ്ട്രീയ ഭാവി തേടിയുള്ള കമലിന്റെ യാത്ര. ഗ്രാമങ്ങളെ സ്വയം പര്യാപ്തമാക്കുക, വിദ്യാഭ്യാസം, കുടിവെള്ളം, ശുചിത്വം, ഗതാഗത സംവിധാനം എന്നിവക്കുള്ള സൗകര്യമൊരുക്കുക തുടങ്ങിയവയാണ് ലക്ഷ്യമെന്ന് കമല്‍ വ്യക്തമാക്കി.