മുംബൈ: എം.ആര്‍.ഐ സ്‌കാനിങ് മെഷിനില്‍ കുടുങ്ങി യുവാവിന് ദാരുണാന്ത്യം. രോഗിയേയും കൊണ്ട് സ്‌കാനിങ് മുറിയില്‍ കടന്ന ബന്ധുവായ രാജേഷ് മാരു എന്ന യുവാവ് മെഷീനില്‍ കുടുങ്ങുകയായിരുന്നു. മുംബൈയിലെ ബി.വൈ.എല്‍ നായര്‍ ചാരിറ്റബിള്‍ ആശുപത്രിയിലായിരുന്നു സംഭവം.
സ്‌കാനിങ് മെഷിനടുത്തേക്ക് ഓക്‌സിജന്‍ സിലിണ്ടറുമായി ചെന്നതാണ് യുവാവിന്റെ മരണത്തിന് ഇടയാക്കിയത്. ആശുപത്രിയിലെ സുരക്ഷാപിഴവാണ് യുവാവിന്റെ മരണത്തിന് കാരണമായതെന്ന് ബന്ധുക്കള്‍ ആരോപിച്ചു.
സ്‌കാനിങ് മുറിയുടെ ചുമതലയുണ്ടായിരുന്ന ജോലിക്കാരന്‍ ആവശ്യപ്പെട്ടതിന്റെ അടിസ്ഥാനത്തിലാണ് യുവാവ് ഓക്‌സിജന്‍ സിലിണ്ടറുമായി എത്തിയത്. ഈ സമയം സ്‌കാനിങ് മെഷിന്‍ പ്രവര്‍ത്തിച്ചു കൊണ്ടിരിക്കുകയായിരുന്നു. മെഷിനിലെ കാന്തിക വലയം ഓക്‌സിജന്‍ സിലിണ്ടറിനെ വലിച്ചെടുക്കുകയായിരുന്നു. ഉടന്‍ തന്നെ ഓക്‌സിജന്‍ സിലിണ്ടര്‍ പൊട്ടിത്തെറിക്കുകയും ചെയ്തു.
സിലിണ്ടറിനൊപ്പം മെഷിനില്‍ കുടുങ്ങിയ യുവാവിനെ പുറത്തെടുത്ത് തീവ്രപരിചരണ വിഭാഗത്തില്‍ പ്രവേശിപ്പിച്ചെങ്കിലും രക്ഷിക്കാനായില്ല.
സംഭവവുമായി ബന്ധപ്പെട്ട ഡ്യൂട്ടി ഡോക്ടറേയും വാര്‍ഡിന്റെ ചുമതലക്കാരനെയും പൊലിസ് അറസ്റ്റ് ചെയ്തു. മരിച്ച യുവാവിന്റെ കുടുംബത്തിന് അടിയന്തര ധനസഹായമായി അഞ്ചുലക്ഷം രൂപ അനുവദിച്ചതായി മുഖ്യമന്ത്രി ദേവേന്ദ്ര ഫഡ്‌നാവിസ് അറിയിച്ചു.