ജിദ്ദ: സഊദിയില്‍ ബഖാല(പലചരക്കുകട) നടത്തിപ്പുകാര്‍ക്ക് മൂന്നു വര്‍ഷ കാലാവധിയുള്ള സ്വതന്ത്ര ഇഖാമ നല്‍കുന്നു. ചില്ലറ വില്‍പന മേഖലയിലെ ബിനാമി ബിസിനസ് അവസാനിപ്പിക്കുന്നതിന് വേണ്ടിയാണ് സ്വതന്ത്ര ഇഖാമ നല്‍കുന്നത്. ഇതുവഴി വിദേശികള്‍ക്ക് സ്‌പോണ്‍സര്‍മാരുടെ പേരില്‍ ചെറുകിട വ്യാപാര സ്ഥാപനങ്ങള്‍ നടത്തുന്നത് അവസാനിപ്പിച്ച് സ്ഥാപനങ്ങള്‍ സ്വന്തം പേരിലാക്കാന്‍ ഇതു സഹായിക്കും.

അതേസമയം സഊദിയില്‍ അഞ്ചു വര്‍ഷത്തിലേറെയായി താമസിക്കുന്ന ബഖാല ഉടമസ്ഥരായ വിദേശികള്‍ക്കാണ് മൂന്നു വര്‍ഷ കാലാവധിയുള്ള സ്വതന്ത്ര ഇഖാമ അനുവദിക്കാന്‍ നിര്‍ദേശം. ഇതിലൂടെ നിയമ വിരുദ്ധമായ ബിനാമി ബിസിനസ് അവസാനിപ്പിക്കാന്‍ സാധിക്കുമെന്നും നിര്‍ദേശം മുന്നോട്ടു വച്ച സ്‌മോള്‍ ആന്‍ഡ് എന്റര്‍പ്രൈസസ് ജനറല്‍ അതോറിറ്റി നല്‍കിയ റിപ്പോര്‍ട്ടില്‍ പറയുന്നു. നിലവില്‍ ബഖാലകള്‍ നൂറു ശതമാനം ബിനാമി ബിസിനസ് ആയാണ് നടക്കുന്നത് ഈയവസ്ഥക്ക് മാറ്റം വരുത്താനും ഇതു വഴി സാധിക്കും. സ്വദേശി കമ്പനികളെ പോലെ വിദേശ കമ്പനികള്‍ക്കും ലൈസന്‍സ് അനുവദിക്കണമെന്നും അതോറിറ്റി സമര്‍പ്പിച്ച മറ്റൊരു സുപ്രധാന നിര്‍ദേശം.