വിക് ആന്‍ സീ (ഹോളണ്ട്): ടാറ്റ സ്റ്റീല്‍ ചെസ്സ് ചലഞ്ചേഴ്‌സ് കിരീടം ഇന്ത്യന്‍ ഗ്രാന്‍മാസ്റ്റര്‍ വിദിത് ഗുജറാത്തിക്ക്. ഈ മാസം 12 മുതല്‍ 28 വരെ ഹോളണ്ടിലെ വിക് ആന്‍ സീയില്‍ അരങ്ങേറിയ ടൂര്‍ണമെന്റില്‍ അപരാജിത മുന്നേറ്റമാണ് ഇന്ത്യന്‍ താരം നടത്തിയത്. 13 റൗണ്ടുകളായി അരങ്ങേറിയ മത്സരത്തില്‍ 9.0 പോയിന്റുകള്‍ നേടിയാണ് ഇന്ത്യന്‍ താരം കിരീടം സ്വന്തമാക്കിയത്. മത്സരത്തില്‍ അഞ്ച് വിജയങ്ങളും എട്ട് സമനിലകളുമായാണ് വിദിത് കുതിച്ചത്. ജയത്തോടെ അടുത്ത വര്‍ഷം അരങ്ങേറുന്ന ടാറ്റ സ്റ്റീല്‍ മാസ്റ്റേഴ്‌സ് ടൂര്‍ണമെന്റിലേക്ക് യോഗ്യത നേടാനും ഇന്ത്യന്‍ താരത്തിന് സാധിച്ചു. ലോക ചാംപ്യന്‍ നോര്‍വെയുടെ മാഗ്നസ് കാള്‍സനടക്കമുള്ള മുന്‍നിര താരങ്ങളുമായി വിദിത് ഏറ്റുമുട്ടും.