ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ കിരീടത്തിലേക്ക് കുതിക്കുന്ന മാഞ്ചസ്റ്റര്‍ സിറ്റി ഇംഗ്ലീഷ് എഫ്.എ കപ്പിന്റെ പ്രീ ക്വാര്‍ട്ടറില്‍. ദുര്‍ബലരായ കാര്‍ഡിഫ് സിറ്റിയെ മറുപടിയില്ലാത്ത രണ്ട് ഗോളുകള്‍ക്ക് വീഴ്ത്തിയാണ് സിറ്റി എഫ്.എ കപ്പിന്റെ അവസാന 16ലേക്ക് കടന്നത്.
ആദ്യ പകുതിയില്‍ കെവിന്‍ ഡിബ്രുയ്ന്‍, റഹിം സ്റ്റെര്‍ലിങ് എന്നിവരാണ് സിറ്റിക്കായി വല ചലിപ്പിച്ചത്. കളി തുടങ്ങി എട്ടാം മിനുട്ടില്‍ തന്നെ ഡിബ്രുയ്‌ന്റെ ഗോളില്‍ സിറ്റി ലീഡെടുത്തു. ഫ്രീ കിക്ക് വലയിലാക്കിയാണ് താരം ടീമിന് ലീഡൊരുക്കിയത്. 37ാം മിനുട്ടില്‍ സ്റ്റെര്‍ലിങിന്റെ ഗോള്‍ അവരുടെ ലീഡുയര്‍ത്തി. വിവിധ പോരാട്ടങ്ങളിലായി താരം ഈ സീസണില്‍ സിറ്റിക്കായി നേടുന്ന 19ാം ഗോളായിരുന്നു ഇത്.
പിന്നീട് രണ്ടാം പകുതിയില്‍ ബെര്‍ണാര്‍ഡ് സില്‍വ വലയില്‍ പന്തെത്തിച്ചെങ്കിലും റഫറി ഓഫ്‌സൈഡ് വിളിച്ചു. അതേസമയം മത്സരത്തിനിടെ അവരുടെ വിങര്‍ ലെറോയ് സനെ പരുക്കേറ്റ് പുറത്ത് പോയത് ടീമിന് ക്ഷീണമായി.
നേരത്തെ കരുത്തരായ ചെല്‍സി, ടോട്ടനം, മാഞ്ചസ്റ്റര്‍ യുനൈറ്റഡ്, ലെയ്സ്റ്റര്‍ സിറ്റി ടീമുകളും അവസാന 16ല്‍ സീറ്റുറപ്പിച്ചിട്ടുണ്ട്. അതേസമയം ലിവര്‍പൂള്‍ കഴിഞ്ഞ ദിവസം വെസ്റ്റ് ബ്രോംവിച് ആല്‍ബിയോണിനോട് അട്ടിമറി തോല്‍വി നേരിട്ട് പുറത്തേക്കുള്ള വഴി കണ്ടിരുന്നു.
ഈ സീസണില്‍ മാഞ്ചസ്റ്റര്‍ സിറ്റി ക്വാഡ്രബിള്‍ കിരീട നേട്ടമാണ് ലക്ഷ്യമിടുന്നത്. പ്രീമിയര്‍ ലീഗ്, എഫ്.എ കപ്പ്, ലീഗ് കപ്പ്, ചാംപ്യന്‍സ് ലീഗ് കിരീട നേട്ടങ്ങളിലാണ് പരിശീലകന്‍ പെപ് ഗെര്‍ഡിയോള കണ്ണുവച്ചിരിക്കുന്നത്. ഇതില്‍ പ്രീമിയര്‍ ലീഗ് കിരീടത്തിലേക്ക് അവര്‍ ഏതാണ്ട് അവകാശമുന്നയിച്ച മട്ടാണ്. നിലവില്‍ 12 പോയിന്റിന്റെ വ്യക്തമായ ലീഡുമായാണ് സിറ്റി കുതിക്കുന്നത്.