മലപ്പുറം: സമസ്ത കേരള ജംഇയ്യത്തുല്‍ ഉലമായുടെ കീഴില്‍ പ്രവര്‍ത്തിച്ചു വരുന്ന താനൂര്‍ ഇസ്‌ലാഹുല്‍ ഉലൂം അറബിക് കോളജ് മാനേജരായി സയ്യിദ് മുഹമ്മദ് കോയ തങ്ങള്‍ ജമലുല്ലൈലി സ്ഥാനമേറ്റു. കഴിഞ്ഞ 10ന് ചേര്‍ന്ന സമസ്ത മുശാവറ യോഗമാണ് തങ്ങളെ തെരഞ്ഞെടുത്തത്.
കോട്ടുമല ബാപ്പു മുസ്‌ലിയാരുടെ നിര്യാണത്തെത്തുടര്‍ന്നു വന്ന ഒഴിവിലേക്കാണ് തെരഞ്ഞെടുപ്പ്. ഇന്നലെ നടന്ന കോളജ് മാനേജിങ് കമ്മിറ്റി യോഗത്തിലാണ് തങ്ങള്‍ സ്ഥാനമേറ്റത്. ഡോ. ബഹാഉദ്ദീന്‍ മുഹമ്മദ് നദ്‌വി ഉദ്ഘാടനം ചെയ്തു. മരക്കാര്‍ ഫൈസി നിറമരുതൂര്‍ അധ്യക്ഷനായി. ജനറല്‍ സെക്രട്ടറി സി.കെ.എം ബാപ്പുട്ടി ഹാജി സ്‌നേഹോപഹാരം നല്‍കി ആദരിച്ചു. സയ്യിദ് ഫഖ്‌റുദ്ദീന്‍ തങ്ങള്‍ കണ്ണന്തളി സ്വാഗതവും പ്രിന്‍സിപ്പല്‍ സി.എം അബ്ദുസ്സമദ് ഫൈസി നന്ദിയും പറഞ്ഞു.