തിരുവനന്തപുരം: സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനോയ് കോടിയേരിയ്‌ക്കെതിരെ ഉയര്‍ന്ന പണം തട്ടിപ്പ് കേസില്‍ ഒത്തുതീര്‍പ്പാക്കാനുള്ള ശ്രമത്തിന് ചുക്കാന്‍ പിടിക്കുന്നത് രണ്ട് എം.എല്‍.എമാരും ഉന്നത സി.പി.എം നേതാക്കളുമാണെന്ന് ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍.

ബിനോയ് കോടിയേരി പണം കൊടുക്കാനുള്ള അറബിയും അഭിഭാഷകനും കഴിഞ്ഞ രണ്ടുദിവസം ആലപ്പുഴയിലുണ്ടായിരുന്നുവെന്നും സുരേന്ദ്രന്‍ ഫെയ്‌സ്ബുക്കില്‍ കുറിച്ചു.

കേസ്സെല്ലാം അവസാനിച്ചുവെന്ന കോടിയേരിയുടേയും മക്കളുടേയും അവകാശവാദം പൊള്ളയാണെന്നാണ് ഇതു വ്യക്തമാക്കുന്നത്. പ്രശ്‌നം ഒത്തുതീര്‍പ്പാക്കാനുള്ള തീവ്രശ്രമങ്ങളാണ് അണിയറയില്‍ നടക്കുന്നത്. പത്രസമ്മേളനം ഒരാഴ്ച കഴിഞ്ഞു നടത്താന്‍ തീരുമാനിച്ചതിന്റെ കാരണവും ഇതു തന്നെയാണെന്നും സുരേന്ദ്രന്‍ പറയുന്നു.

ഫെയ്‌സ്ബുക്ക് പോസ്റ്റിന്റെ പൂര്‍ണരൂപം:

ബിനോയ് കോടിയേരി പണം കൊടുക്കാനുള്ള അറബിയും അഭിഭാഷകനും കഴിഞ്ഞ രണ്ടുദിവസം ആലപ്പുഴയിലുണ്ടായിരുന്നു. കേസ്സെല്ലാം അവസാനിച്ചുവെന്ന കോടിയേരിയുടേയും മക്കളുടേയും അവകാശവാദം പൊള്ളയാണെന്നാണ് ഇതു വ്യക്തമാക്കുന്നത്. പ്രശ്നം ഒത്തുതീർപ്പാക്കാനുള്ള തീവ്രശ്രമങ്ങളാണ് അണിയറയിൽ നടക്കുന്നത്. ഇടനിലക്കാരായി രണ്ടു എം. എൽ. എമാരും ഉന്നത സി. പി. എം നേതാക്കളുമാണ് കരുക്കൾ നീക്കുന്നത്. പത്രസമ്മേളനം ഒരാഴ്ച കഴിഞ്ഞു നടത്താൻ തീരുമാനിച്ചതിൻറെ കാരണവും ഇതു തന്നെയാണ്.