ചേര്‍ത്തല : താലൂക്ക് ഗവ. ആശുപത്രിക്ക് ദേശിയ അംഗീകാരം നല്‍കിയ എന്‍.ആര്‍.എച്ച്.എം പിന്തുണ പിന്‍വലിച്ചതോടെ ആശുപത്രിയുടെ ദേശീയ അംഗീകാരം നഷ്ടപ്പെട്ടേക്കാം.
2012 സെപ്തംബര്‍ 27 നാണ് ആശുപത്രിക്ക് എന്‍ആര്‍എച്ച്എമ്മിന്റെ ദേശീയ അംഗീകാരം ലഭിച്ചത്. ദേശീയ അംഗീകാരം ലഭിക്കുന്ന സംസ്ഥാനത്തെ ആദ്യ സര്‍ക്കാര്‍ താലൂക്ക് ആശുപത്രിയാണിത്. എന്നാല്‍ അംഗീകാരത്തിന്റെ കാലപരിധി 2015 സെപ്തംബര്‍ 26ന് അവസാനിച്ചു. ഇത് പുതുക്കുന്നതിന് ഇതുവരെയും കഴിഞ്ഞിട്ടില്ല.
അംഗീകാരം നിലനിര്‍ത്തണമെങ്കില്‍ മാനദണ്ഡങ്ങള്‍ പാലിക്കേണ്ടതുണ്ട്. ആദ്യഘട്ടത്തില്‍ എന്‍ആര്‍എച്ച്എമ്മാണ് ആശുപത്രിക്ക് ആവശ്യമായ സഹായം നല്‍കിയത്. ജീവനക്കാരുടെ കുറവ് പരിഹരിക്കുന്നതിന് താല്‍കാലികമായി നഴ്‌സുമാരെയും ഡോക്ടര്‍മാരെയും എന്‍ആര്‍എച്ച്എം നിയമിച്ചിരുന്നു.
സര്‍ക്കാരിന്റെയും എംപി, എംഎല്‍എ ഫണ്ടിലുമായി കോടിക്കണക്കിന് രൂപയുടെ വികസനപ്രവര്‍ത്തനങ്ങളാണ് ദേശീയ അംഗീകാരം നേടിയെടുക്കുന്നതിനായി ചെലവഴിച്ചത്.
എന്നാല്‍ ഇത് നിലനിര്‍ത്തുവാന്‍ ആശുപത്രി അധികൃതര്‍ താല്‍പര്യം കാട്ടുന്നില്ലെന്നാണ് ആക്ഷേപം. അംഗീകാരം പുതുക്കുന്നതിന്റെ ഭാഗമായി 2016 അവസാനം എന്‍.എ.ബി.എച്ച് അധികൃതര്‍ ആശുപത്രിയില്‍ എത്തി പരിശോധന നടത്തിയെങ്കിലും പല ന്യൂനതകളും കണ്ടെത്തുകയും ഇവ പരിഹരിക്കുവാന്‍ നിര്‍ദേശവും നല്‍കിയിരുന്നു.
എന്നാല്‍ ഇപ്പോള്‍ എന്‍ആര്‍എച്ച്എമ്മിന്റെ സഹായം ആശുപത്രിക്ക് ലഭിക്കാത്തതിനാല്‍ ദേശീയ അംഗീകാരത്തിന്റെ ഭാഗമായ ജീവനക്കാരുടെ നിശ്ചിത എണ്ണം ലഭ്യമാക്കുവാന്‍ കഴിയില്ലെന്നാണ് ആശുപത്രി അധികൃതര്‍ പറയുന്നത്.
എന്നാല്‍ ആശുപത്രിയുടെ അംഗീകാരം നഷ്ടപ്പെടാന്‍ അനുവദിക്കില്ലെന്നും ഇത് നിലനിര്‍ത്തുന്നതിന് ആവശ്യമായത് ചെയ്യുമെന്നും നഗരസഭാധ്യക്ഷന്‍ ഐസക് മാടവന പറഞ്ഞു.