റിയാദ്: സഊദിയുടെ അതിര്‍ത്തി കാക്കാന്‍ ഇനി മിഴി തുറന്നു എയര്‍ ബലൂണുകളും. രാജ്യ സുരക്ഷക്കായി ഒരുക്കുന്ന അത്യാധുനിക സംവിധാനത്തോടെയുള്ള എയര്‍ ബലൂണുകളുടെ ആദ്യ ഘട്ട പരീക്ഷണം വിജയ കാരമായി പൂര്‍ത്തിയായി. അതിര്‍ത്തിയില്‍ കാവലിരിക്കുന്ന സൈനികര്‍ക്ക് സഹായകരമായി കൂടുതല്‍ സജ്ജീകരണങ്ങളോടെയാണ് എയര്‍ ബലൂണ്‍ രംഗത്തിറങ്ങുക.

പ്രിന്‍സ് സുല്‍ത്താന്‍ അഡ്വാന്‍സ്ഡ് ടെക്‌നിക്കല്‍ റിസേര്‍ച് ഇന്‍സ്റ്റിറ്റ്യൂട്ടിലാണ് പുതിയ എയര്‍ ബലൂണിന്റെ പരീക്ഷണം പൂര്‍ത്തിയാക്കിയത്. അത്യാധുനിക സംവിധാനത്തില്‍ പകലിലും രാത്രിയിലും വളരെ കൃത്യമായി നിരീക്ഷണം നടത്താന്‍ സഹായിക്കുന്ന തരത്തിലുള്ള ക്യാമറയാണ് ഇതില്‍ ഘടിപ്പിച്ചിരിക്കുന്നത്. മെയിന്‍ കണ്‍ട്രോള്‍ റൂമുമായി ബന്ധപ്പെടുത്തുന്ന ഇത് ആവശ്യത്തിനനുസരിച്ചു 360 ഡിഗ്രിയില്‍ പൂര്‍ണ്ണമായി തിരിച്ച് ചിത്രങ്ങളും മറ്റും കൃത്യമായി മനസ്സിലാക്കാനും സാധിക്കും. ഒരു തവണ അതിര്‍ത്തിയിലേക്ക് പറന്നാല്‍ 14 ദിവസം വരെ 2000 ഫീറ്റ് ഉയരത്തില്‍ ഇത് അതിര്‍ത്തിയില്‍ കണ്ണു മിഴിച്ചു നില്‍ക്കാനാകും