കോട്ടയം: തെരുവ് നായയുടെ കുരകേട്ട് ഗജവീരന്‍ തിരുനക്കര ശിവന്‍ ഭയന്നോടി. ഇന്നലെ വൈകിട്ടാണ് ഭക്ഷണം ശേഖരിക്കുന്നതിനായി തിരുവാതുക്കല്‍ ഭാഗത്തേയ്ക്ക് പോകുകയായിരുന്ന ശിവന്റെ മുന്നിലേയ്ക്ക് ബൈക്കിന് കുറുകെ ചാടിയ തെരുവ് നായ കുരച്ച് ഓടിയെത്തുകയായിരുന്നു.
ഭയാനകമാം വിധം കുരച്ചുകൊണ്ട് പാഞ്ഞടുത്ത തെരുവ് നായയെ കണ്ട് ശിവന്‍ പേടിച്ച് ഓടുകയായിരുന്നെന്ന് പൊലീസ് പറഞ്ഞു. പേടിച്ച് ഓടിയ ആന തൊട്ടടുത്തുള്ള പാടത്ത് എത്തിയോടെയാണ് ശാന്തനായത്. തുടര്‍ന്ന് പാപ്പന്‍ എത്തി അനുനയിപ്പിച്ച് തിരികെ വിളിയ്ക്കുകയായിരുന്നു.
തുടര്‍ന്ന് ഭക്ഷണവും ശേഖരിച്ച് തിരികെ വരുന്ന ശിവന് സുഗമമായ യാത്രയ്ക്കായി പൊലീസ് റോഡില്‍ ട്രാഫിക്ക് നിയന്ത്രിച്ചു. എത്രയും വേഗം തേവരുടെ അടുത്ത് എത്താന്‍ വേണ്ടി പാപ്പാനെയും മുകളിലേറ്റി പനമ്പട്ടയും വഹിച്ച വളരെ വേഗതയിലായിരുന്നു ശിവന്റെ യാത്ര. തിരുനക്കര ക്ഷേത്ര മതില്‍ക്കെട്ടിനുള്ളില്‍ പ്രവേശിച്ച ശിവന്‍ ശേഖരിച്ച് കൊണ്ടുവന്ന ഭക്ഷണം സൂക്ഷിച്ച് വച്ച് ശാന്തനായി.
സുഖചികിത്സയ്ക്ക് ശേഷം ഗജവീരന്‍ തിരുനക്കര ശിവന്‍ തിരികെ കോട്ടയത്ത് എത്തിയിട്ട് ഏതാനും ദിവസങ്ങള്‍ മാത്രമെ ആയിട്ടുള്ളൂ.