പട്‌ന: ബിഹാറില്‍ ഗംഗാ നദിയില്‍ ബോട്ട് മുങ്ങി അഞ്ചുപേര്‍ മരിച്ചു. അഞ്ചുപേര്‍ക്കുവേണ്ടിയുള്ള തെരച്ചില്‍ തുടരുകയാണെന്ന് പൊലിസ് അറിയിച്ചു. ഇന്നലെ രാവിലെ 10ഓടെയായിരുന്നു അപകടം.
പട്‌ന ജില്ലയിലെ ഫത്തുഹക്കടുത്ത മസ്താനഘട്ടിലായിരുന്നു അപകടം. മാഘി പൂര്‍ണിമ ചടങ്ങിനായി പുഴയുടെ തീരത്ത് എത്തിയ വന്‍ജനക്കൂട്ടം നോക്കിനില്‍ക്കെയാണ് 15 പേരുമായി പോകുകയായിരുന്ന ബോട്ട് മുങ്ങിയത്. അഞ്ചുപേര്‍ നീന്തി രക്ഷപ്പെട്ടതായി പൊലിസ് പറഞ്ഞു.
ഗയ ജില്ലാ സ്വദേശികളാണ് ബോട്ടിലുണ്ടായിരുന്നത്. ഇവരെല്ലാം ബന്ധുക്കളായിരുന്നുവെന്നാണ് വിവരം.
ഇവരും മാഘിപൂര്‍ണിമ ചടങ്ങിന് എത്തിയതായിരുന്നു. മരിച്ചവരുടെ ആശ്രിതര്‍ക്ക് നാല് ലക്ഷം രൂപ അടിയന്തര ധനസഹായം അനുവദിച്ചിട്ടുണ്ട്.