കൊണ്ടോട്ടി: ഹജ്ജ് വിമാന സര്‍വിസിന് കരിപ്പൂരിനെ തഴഞ്ഞത്    ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ (ഡി.ജി.സി.എ) സംഘത്തിന്റെ റണ്‍വേ റീകാര്‍പ്പറ്റിങ് പരിശോധനാ റിപ്പോര്‍ട്ട് പോലും നിരാകരിച്ച്. വ്യോമയാന മന്ത്രിയുടെ നിര്‍ദേശ പ്രകാരം കഴിഞ്ഞ മാസം ഒന്‍പത്, പത്ത്  തിയതികളിലാണ് നവീകരിച്ച റണ്‍വേ ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍  (ഡി.ജി.സി.എ) ദക്ഷിണ മേഖലാ ഡയറക്ടര്‍ മനോജ് ബൊക്കാഡെ, എയര്‍പോര്‍ട്ട് അതോറിറ്റി ഡല്‍ഹി  കേന്ദ്രകാര്യലയ ജനറല്‍ മാനേജര്‍ രാഗേഷ് സങ്, സീനിയര്‍ മാനേജര്‍ വിനോദ് ജട്‌ലി  എന്നിവരടങ്ങുന്ന സംഘം പരിശോധിച്ചത്.
റീകാര്‍പ്പറ്റിങ് പൂര്‍ത്തിയായ കരിപ്പൂര്‍  വിമാനത്താവളത്തിന്റെ റണ്‍വേയില്‍ 300, 350 യാത്രക്കാരെ വഹിക്കാന്‍ ശേഷിയുള്ള എ 330 വിഭാഗത്തില്‍പെടുന്ന  വിമാനങ്ങള്‍ക്ക്  സര്‍വിസ് നടത്താനുളള പ്രാപ്തിയുണ്ടെന്നാണ് സംഘത്തിന്റെ വിലയിരുത്തല്‍. വലിയ ജംമ്പോ വിമാനങ്ങള്‍ ഇറങ്ങുന്നതിന്,  റണ്‍വേ കഴിഞ്ഞും തെന്നിനീങ്ങുന്ന വിമാനങ്ങള്‍ നില്‍ക്കാനായി തയാറാക്കിയ  ചതുപ്പുപോലുള്ള ഭാഗമായ  റിസ ഏരിയ അടക്കം വികസിപ്പിക്കേണ്ടതുണ്ട്. ആദ്യഘട്ടത്തില്‍ എ 330 വിഭാഗത്തിലുള്ള ഇടത്തരം  വിമാനങ്ങള്‍ക്ക് സര്‍വിസ് നടത്താനുളള അനുമതി  നല്‍കണമെന്ന് എയര്‍പോര്‍ട്ട് അതോറിറ്റിയും ഡി.ജി.സി.എ യോട് ആവശ്യപ്പെട്ടിരുന്നു. എന്നാല്‍  ഡി.ജി.സി.എ നടത്തിയ  പരിശോധനാ റിപ്പോര്‍ട്ട് പോലും പരിഗണിക്കാതെയാണ്  ഇത്തവണ നെടുമ്പാശേരിയില്‍ നിന്ന് ഹജ്ജ്  വിമാന സര്‍വിസിന് ടെന്‍ഡര്‍ വിളിച്ചിരിക്കുന്നത്.
   9383 അടിയാണ് കരിപ്പൂര്‍ റണ്‍വേയുളളത്.  എന്നാല്‍ ലഖ്‌നോ വിമാനത്താവളത്തില്‍ 9180 അടി മാത്രമാണുള്ളത്. ഇവിടെ ഹജ്ജ് സര്‍വിസ് അനുവദിച്ചിട്ടുമുണ്ട്. എ.ബി.330, എ.ബി.320, 321  ഇനത്തിലുള്ള  വിമാനങ്ങള്‍ക്കാണ് ഇവിടെ നിന്ന് അനുമതി.  12,960  ഹജ്ജ് തീര്‍ഥാടകരാണ്  ലഖ്‌നോവില്‍ നിന്നുള്ളത്. എന്നാല്‍ അതിലും കൗതുകകരമായ മറ്റൊരുകാര്യം, റണ്‍വേ നവീകരണം  ഈയടുത്ത് നടന്ന 7500 അടിമാത്രമുള്ള ബിഹാറിലെ   ഗയ വിമാനത്താവളത്തിലും എ.ബി 320 ഇനത്തില്‍ പെട്ട വിമാനം ഉപയോഗിച്ച്  ഹജ്ജ്  സര്‍വിസ്  നടത്തുന്നത്  പരിഗണനയിലുണ്ടെന്നതാണ്.
റണ്‍വേ  റീകാര്‍പ്പറ്റിങിന്റെ പേരില്‍  2015 മെയ് മുതലാണ് വലിയ വിമാനങ്ങള്‍  കരിപ്പൂരില്‍ നിര്‍ത്തലാക്കിയത്. റണ്‍വേ പ്രവൃത്തികള്‍ പൂര്‍ത്തിയായെങ്കിലും നീളം വര്‍ധിപ്പിക്കണമെന്നാവശ്യപ്പെട്ട് വലിയ വിമാനങ്ങള്‍ക്ക് അനുമതി നല്‍കാനാവില്ലെന്ന് ഡി.ജി.സി.എ  തീരുമാനമെടുക്കുകയായിരുന്നു.  നിര്‍ത്തലാക്കിയ വലിയ വിമാനങ്ങള്‍  കരിപ്പൂരില്‍ പുനരാരംഭിക്കണമെന്നാവശ്യപ്പെട്ട് കഴിഞ്ഞ നവംബറില്‍ മുഖ്യമന്ത്രി പിണറായി വിജയന്റെ നേതൃത്വത്തിലുള്ള സംഘം  വ്യോമയാന മന്ത്രി അശോക് ഗജപതിരാജുവിനെ സന്ദര്‍ശിച്ചിരുന്നു. ഇതിനെ തുടര്‍ന്ന് കരിപ്പൂരില്‍  വലിയ വിമാനങ്ങള്‍ ഇറക്കുന്നതിന്  പ്രാപ്തമാണോ എന്ന് പരിശോധിക്കാന്‍ ഡി.ജി.സി.എ സംഘത്തെ അയക്കുമെന്ന്  കേന്ദ്ര മന്ത്രി അറിയിച്ചിരുന്നു. ഇതിന്റെ ഭാഗമായാണ് ഡി.ജി.സി.എ സംഘം കരിപ്പൂരില്‍  പരിശോധനക്കെത്തിയത്. ഈ പരിശോധനാ റിപ്പോര്‍ട്ടാണ് കേന്ദ്രം നിരാകരിച്ചത്.