ന്യൂഡല്‍ഹി: ഖേലോ ഇന്ത്യ ദേശീയ സ്‌കൂള്‍ ഗെയിംസിന്റെ ആദ്യ ദിനത്തില്‍ കേരളത്തിന് മൂന്ന് മെഡലുകള്‍. ഒരോ സ്വര്‍ണം, വെള്ളി, വെങ്കലം മെഡലുകളാണ് കേരളം ബാസ്‌കറ്റിലെത്തിച്ചത്.
പെണ്‍കുട്ടികളുടെ 1500 മീറ്ററില്‍ സി ചാന്ദ്‌നി സുവര്‍ണ താരമായി മാറിയപ്പോള്‍ പെണ്‍കുട്ടികളുടെ ട്രിപ്പിള്‍ ജംപില്‍ സാന്ദ്ര ബാബു വെള്ളിയും ആണ്‍കുട്ടികളുടെ 1500 മീറ്ററില്‍ ആകാശ് എം വര്‍ഗീസ് വെങ്കലവും കേരളത്തിന് സമ്മാനിച്ചു. പാലക്കാട് കല്ലടി സ്‌കൂള്‍ വിദ്യാര്‍ഥിയായ ചാന്ദ്‌നിയുടെ സുവര്‍ണ നേട്ടം നാടകീയമായിരുന്നു. പെണ്‍കുട്ടികളുടെ 1500 മീറ്ററില്‍ ഗുജറാത്ത് താരമായിരുന്നു ഒന്നാമതെത്തിയത്. എന്നാല്‍ പിന്നീട് താരത്തെ അയോഗ്യയാക്കിയതോടെ രണ്ടാം സ്ഥാനത്തെത്തിയ ചാന്ദ്‌നിയെ സുവര്‍ണ താരമായി പ്രഖ്യാപിക്കുകയായിരുന്നു. പോയിന്റ് പട്ടികയില്‍ നിലവില്‍ കേരളം നാലാം സ്ഥാനത്ത് നില്‍ക്കുന്നു.