ന്യൂഡല്‍ഹി: കേന്ദ്ര ആഭ്യന്തര മന്ത്രാലയത്തിന്റെ വെബ്‌സൈറ്റ് ഹാക്ക് ചെയ്യാന്‍ ശ്രമം. ഇതേതുടര്‍ന്ന് സൈറ്റ് അധികൃതര്‍ താല്‍ക്കാലികമായി പൂട്ടി.വെബ്‌സൈറ്റ് ഹാക്ക് ചെയ്യാന്‍ ശ്രമം നടന്നതായി വിവരം ലഭിച്ചതിനെ തുടര്‍ന്ന് നാഷനല്‍ ഇന്‍ഫര്‍മാറ്റിക്‌സ് സെന്ററാണ് സൈറ്റ് പൂട്ടിയത്. കംപ്യൂട്ടര്‍ എമര്‍ജന്‍സി റെസ്‌പോണ്‍സ് സംഘം സംഭവം അന്വേഷിക്കുകയാണെന്നും വിശദവിവരങ്ങള്‍ ലഭ്യമായിട്ടില്ലെന്നും സര്‍ക്കാര്‍ വൃത്തങ്ങള്‍ അറിയിച്ചു.
കഴിഞ്ഞ മാസം പാകിസ്താനുമായി ബന്ധമുള്ള സംഘം ദേശീയ സുരക്ഷാ ഗാര്‍ഡിന്റെ വെബ്‌സൈറ്റ് ഹാക്ക് ചെയ്തിരുന്നു. ഹാക്ക് ചെയ്ത ശേഷം പ്രധാനമന്ത്രി നരേന്ദ്ര മോദിക്കെതിരേയുള്ള അസഭ്യങ്ങളും ഇന്ത്യാവിരുദ്ധ സന്ദേശങ്ങളും കൊണ്ട് സൈറ്റിന്റെ ഹോംപേജ് വികൃതമാക്കുകയായിരുന്നു. 'എലോണ്‍ ഇഞ്ചക്ടര്‍' എന്ന് ഹാക്കര്‍മാര്‍ സ്വയം പരിചയപ്പെടുത്തുകയും ചെയ്തിരുന്നു.
അടുത്തിടെ പുറത്തുവന്ന വിവരമനുസരിച്ച് കേന്ദ്ര-സംസ്ഥാന സര്‍ക്കാര്‍ വകുപ്പുകളുടെ 700ഓളം വെബ്‌സൈറ്റുകള്‍ കഴിഞ്ഞ നാലുവര്‍ഷത്തിനിടെ ഹാക്ക് ചെയ്യപ്പെട്ടിട്ടുണ്ട്. ഇതുമായി ബന്ധപ്പെട്ട് സൈബര്‍ കുറ്റകൃത്യം ആരോപിച്ച് 8,348 പേര്‍ അറസ്റ്റിലാകുകയും ചെയ്തിട്ടുണ്ട്.