സൂറിച്ച്: സ്വിറ്റ്‌സര്‍ലന്റില്‍ മുസ്‌ലിം വിരുദ്ധ പ്രക്ഷോഭങ്ങള്‍ക്ക് പിന്നാലെ  പൗരത്വ നിയമം ലഘൂകരിക്കുന്നതിനുള്ള ഹിതപരിശോധന നടന്നു. അഭയാര്‍ഥികള്‍ക്ക് സ്വിസ് പൗരത്വം നല്‍കുന്നതിനുള്ള  നിയമക്കുരുക്ക് ഇല്ലാതാക്കാനാണ് നടപടി. മൂന്നാം തലമുറ അഭയാര്‍ഥികളെ പൗരന്മാരാക്കണോ വേണ്ടയോ എന്ന വിഷയത്തിലാണ് ഹിതപരിശോധന.
നിലവില്‍ സ്വിറ്റ്‌സര്‍ലന്റില്‍ ജനിച്ചാല്‍ മാത്രം പൗരത്വം ലഭിക്കില്ല. മാതാപിതാക്കളും സ്വിസ്പൗരന്മാരാകണം. സ്വിറ്റ്‌സര്‍ലന്റിനു പുറത്തുള്ളവരുടെ പൗരത്വ അപേക്ഷ തീരുമാനമാകാന്‍ 12 വര്‍ഷത്തെ കാത്തിരിപ്പ് വേണം.  പരീക്ഷയും സര്‍ക്കാര്‍ നടത്തുന്ന അഭിമുഖവും പാസാകണം. പൗരത്വം ലഭിക്കാന്‍ സാമ്പത്തിക ചെലവുമുണ്ട്. ഹിതപരിശോധനയുടെ ആദ്യഘട്ട ഫലസൂചനകളും പുറത്തുവന്നു. 59 ശതമാനം സ്വിസ് പൗരന്മാരും നിയമത്തില്‍ ഇളവു നടപ്പാക്കണമെന്ന അഭിപ്രായക്കാരാണ്.
രാജ്യത്ത് ജനിച്ചയാളോട് സ്വിസ് പൗരനാണോയെന്ന് ചോദിക്കേണ്ടിവരുന്നത് പരിഹാസ്യമാണെന്ന് വ്യാപക പരാതി ഉയര്‍ന്നിരുന്നു. ഭരണത്തിലുള്ള വലതുപക്ഷ കക്ഷി സ്വിസ് പീപ്പിള്‍സ് പാര്‍ട്ടിക്ക് തിരിച്ചടിയാണ് ഹിതപരിശോധനാ ഫലം. പുതിയ നിയമം വന്നാല്‍ അത് ഇസ്്‌ലാമിക വല്‍ക്കരണത്തിന് കാരണമാകുമെന്നാണ് ഹിതപരിശോധനയെ എതിര്‍ക്കുന്നവരുടെ വാദം.  ഇതു വിശദീകരിച്ച് ഇത്തരം വിഭാഗക്കാര്‍ പോസ്റ്റര്‍ പ്രചാരണവുമായി രംഗത്തെത്തിയിട്ടുണ്ട്. രാജ്യത്തെ അഭയാര്‍ഥികളില്‍ മൂന്നില്‍ രണ്ട് ഭാഗവും ഇറ്റാലിയന്‍ അഭയാര്‍ഥികളാണ്. ബാള്‍ക്കണ്‍, തുര്‍ക്കി വംശജരാണ് ശേഷിക്കുന്നവര്‍.
പുതിയ നിയമം വന്നാല്‍ ടൗണ്‍ കൗണ്‍സിലുകള്‍ നടത്തുന്ന ഇന്റര്‍വ്യൂവില്‍ പാസാകുന്നവര്‍ക്ക് പൗരത്വം ലഭിക്കും. പ്രാദേശിക വിവരങ്ങളെ കുറിച്ചാണ് അഭിമുഖത്തില്‍ ചോദ്യം ഉന്നയിക്കുക. കഴിഞ്ഞ 30 വര്‍ഷത്തിനിടെ മൂന്ന് തവണ പൗരത്വ നിയമം ലഘൂകരിക്കാനുള്ള ശ്രമം നടന്നിരുന്നുവെങ്കിലും പരാജയപ്പെട്ടിരുന്നു.