വല്‍സാദ്: ഗുജറാത്തിനെതിരായ കേണല്‍ സി.കെ നായിഡു ട്രോഫി ചതുര്‍ദിനത്തില്‍ കേരളം തോല്‍വിയിലേക്ക്. കേരളം മുന്നോട്ടു വച്ച 118 റണ്‍സ് ലക്ഷ്യത്തിലേക്ക് ബാറ്റു വീശുന്ന ഗുജറാത്ത് മൂന്നാം ദിനം കളി നിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ 36 റണ്‍സെന്ന നിലയില്‍. ഒരു ദിവസവും ഒന്‍പതു വിക്കറ്റുകളും കൈയിലിരിക്കേ ഗുജറാത്തിനു വിജയത്തിനു 82 റണ്‍സ് കൂടി മതി. 22 റണ്‍സുമായി കേതന്‍ പട്ടേലും 12 റണ്‍സുമായി എ.യു പട്ടേലുമാണു ക്രീസില്‍. നേരിട്ട ആദ്യ പന്തില്‍ തന്നെ ആതിഫ് ബിന്‍ അഷ്‌റഫിന്റെ പന്തില്‍ ക്ലീന്‍ ബൗള്‍ഡായി രാജ് മജിതിയ പുറത്തായി. കേരളം ആദ്യ ഇന്നിങ്‌സില്‍ 161ഉം രണ്ടാമിന്നിങ്‌സില്‍ 254ഉം റണ്‍സെടുത്തു. ഗുജറാത്ത് ഒന്നാം ഇന്നിങ്‌സില്‍ 298 റണ്‍സ് സ്വന്തമാക്കി.
നേരത്തെ 137 റണ്‍സ് ലീഡ് വഴങ്ങി രണ്ടാമിന്നിങ്‌സ് തുടങ്ങിയ കേരളത്തിനായി സല്‍മാന്‍ നിസാര്‍ (67), ഫാബിദ് അഹമദ് (60), അക്ഷയ് ചന്ദ്രന്‍ (58) എന്നിവര്‍ അര്‍ധ സെഞ്ച്വറി നേടി സ്‌കോര്‍ 250 കടത്തുകയായിരുന്നു. ഗുജറാത്തിനായി എ.ജെ ടെന്‍ഡല്‍ അഞ്ചു വിക്കറ്റുകള്‍ പിഴുതു.