കോഴിക്കോട്: മലയാളത്തിന്റെ പ്രിയ എഴുത്തുകാരി കമലാ സുരയ്യയെ ആദരിച്ച് ഗൂഗിള്‍. 1976 ഫെബ്രുവരി ഒന്നിനു കമലാ സുരയ്യയുടേതായി ആദ്യമായി പ്രസിദ്ധീകരിച്ച 'എന്റെ കഥ' എന്ന കൃതിയെ ആദരിക്കാനാണ് ഫെബ്രുവരി ഒന്നിന് 'സെലിബ്രേറ്റിങ് കമലാ ദാസ് 'എന്ന പേരില്‍ ഡൂഡിള്‍ ഗൂഗിള്‍ നല്‍കിയത്.
എഴുത്തിന്റെ ലോകത്തേക് സ്ത്രീകള്‍ക്ക് ജാലകം തുറന്നുനല്‍കിയ വ്യക്തിത്വം എന്ന വിശേഷണത്തോടെയാണ് ഗൂഗിള്‍ ഇന്ത്യ കമലാ സുരയ്യയെ പരിചയപ്പെടുത്തുന്നത്. മഞ്ജിത് താപ് എന്ന കലാകാരനാണ് ഡൂഡിള്‍ തയാറാക്കിയത്.
മലയാളത്തിലും ഇംഗ്ലീഷിലും കമലാ സുരയ്യയുടെ രചനകള്‍ പ്രശസ്തമാണ്. ആധുനിക ഇന്ത്യന്‍ ഇംഗ്ലീഷ് എഴുത്തുകളുടെ മാതാവ് എന്നാണ് സുരയ്യയെ ലോക സാഹിത്യം വിശേഷിപ്പിക്കുന്നത്. 1934 മാര്‍ച്ച് 31ന് തൃശൂര്‍ പുന്നയൂര്‍കുളത്ത് ജനിച്ച മാധവിക്കുട്ടി 1999ല്‍ 67ാം വയസില്‍ ഇസ്‌ലാം ആശ്ലേഷിച്ചിരുന്നു. തുടര്‍ന്നും എഴുത്തില്‍ സജീവമായ അവര്‍ 2009 മെയ് 31 ന് അന്തരിച്ചു.