ലോക്‌സഭാ തെരഞ്ഞെടുപ്പിന് ഒരു വര്‍ഷം മാത്രം ബാക്കിയിരിക്കെ മോദി സര്‍ക്കാരിന്റെ അവസാനത്തെ സമ്പൂര്‍ണ ബജറ്റാണ് ഇന്നലെ ധനമന്ത്രി അരുണ്‍ ജെയ്റ്റ്‌ലി അവതരിപ്പിച്ചത്. കാര്‍ഷിക മേഖലക്കും ഗ്രാമീണ മേഖലക്കും ഊന്നല്‍ നല്‍കുന്ന ബജറ്റ് പൂര്‍ണമായും തെരഞ്ഞെടുപ്പ് ലക്ഷ്യം വച്ചു മാത്രമാണ്. ചില മേഖലകള്‍ക്ക് നേട്ടമുണ്ടാക്കിയപ്പോള്‍ മറ്റുചില മേഖലകള്‍ക്ക് കനത്ത തിരിച്ചടിയും ഉണ്ടാക്കിയ ബജറ്റാണ് ജെയ്റ്റ്‌ലി അവതരിപ്പിച്ചത്.
കാര്‍ഷിക, ആരോഗ്യ മേഖലകള്‍, അടിസ്ഥാന സൗകര്യങ്ങള്‍, കോര്‍പ്പറേറ്റ് മേഖല എന്നിവക്ക് വലിയ നേട്ടമുണ്ടാക്കിയപ്പോള്‍ ധനകാര്യം, ആദായനികുതി ദായകര്‍, മൊബൈല്‍ കമ്പനികള്‍ എന്നിവക്ക് കനത്ത തിരിച്ചടിയാണ് ഉണ്ടാക്കിയിട്ടുള്ളത്.
ബജറ്റ് യഥാര്‍ഥത്തില്‍ തെരഞ്ഞെടുപ്പ് മുന്‍പില്‍ കണ്ടുകൊണ്ടുള്ളതുമാത്രമാണ്. സാധാരണക്കാരുടെ പ്രതീക്ഷകളും അഭിലാഷങ്ങളും യാഥാര്‍ഥ്യമാക്കുന്നതാണ് ബജറ്റ് എന്ന മോദിയുടെ അവകാശവാദം ശരിയല്ലെന്നതാണ് നിത്യോപയോഗ സാധനങ്ങളുടെ കാര്യത്തില്‍ ബജറ്റിലുണ്ടായ തീരുമാനങ്ങള്‍. ത്രിപുര, മേഘാലയ, നാഗാലന്‍ഡ് എന്നീ വടക്കു കിഴക്കന്‍ സംസ്ഥാനങ്ങളിലും കര്‍ണാടകയിലും ഈ വര്‍ഷവും മധ്യപ്രദേശ്, രാജസ്ഥാന്‍, ഛത്തീസ്ഗഡ് ഉള്‍പ്പെടെ 10 സംസ്ഥാനങ്ങളില്‍ അടുത്ത വര്‍ഷവും തെരഞ്ഞെടുപ്പ് നടക്കും. അടുത്ത വര്‍ഷം തന്നെയാണ് പാര്‍ലമെന്റ് തെരഞ്ഞെടുപ്പും.
ഇത്രയും തെരഞ്ഞെടുപ്പുകള്‍ മുന്നിലുള്ളപ്പോള്‍ കേന്ദ്ര സര്‍ക്കാര്‍ ലക്ഷ്യമിട്ടത് രാജ്യത്തെ ഏറ്റവും വലിയ വോട്ട് ബാങ്കായ ഗ്രാമീണ മേഖലകളെയാണ്. ഗുജറാത്ത് തെരഞ്ഞെടുപ്പില്‍ ഗ്രാമീണ മേഖലകളില്‍ ബി.ജെ.പി നേരിട്ട തിരിച്ചടിയും ഒരു പാഠമാക്കിയാണ് അവര്‍ ബജറ്റില്‍ ഗ്രാമീണ മേഖലയെ സ്വാധീനിക്കാന്‍ ശ്രമം നടത്തിയത്.