സര്‍ക്കാരിന്റെ അവസാനത്തെ സമ്പൂര്‍ണ ബജറ്റ് പുതിയ ഇന്ത്യയുടെ നിര്‍മിതിക്കായി ഉപകാരപ്പെടുന്നതെന്ന് പ്രധാനമന്ത്രി നരേന്ദ്ര മോദി. അതേസമയം 2019ലെ പൊതു തെരഞ്ഞെടുപ്പില്‍ ബി.ജെ.പിയുടെ വിജയത്തിന് അടിത്തറയിടുന്നതിനുള്ള ബജറ്റാണെന്ന വിമര്‍ശനം ഇതിനകം തന്നെ ഉയര്‍ന്നിട്ടുണ്ട്. സ്ത്രീകള്‍, കര്‍ഷകര്‍, യുവാക്കള്‍, സാമ്പത്തികമായി പിന്നാക്കം നില്‍ക്കുന്നവര്‍, മധ്യവര്‍ത്തി സമൂഹം, പ്രത്യേക നേട്ടങ്ങളൊന്നും ലഭിക്കാത്ത സമുദായങ്ങള്‍ എന്നിവരെയെല്ലാം എന്‍.ഡി.എ പക്ഷത്തേക്ക് അടുപ്പിക്കുന്ന തരത്തിലുള്ളതാണ് ബജറ്റ്. കേന്ദ്ര ബജറ്റ് തികച്ചും തെരഞ്ഞെടുപ്പ് ലക്ഷ്യം വച്ചതാണെന്ന് ശിവസേന അടക്കമുള്ള പാര്‍ട്ടികള്‍ ആരോപിച്ചു. ജി.എസ്.ടി, നോട്ടുനിരോധനം എന്നിവയിലൂടെ വിമര്‍ശനം നേരിട്ട സര്‍ക്കാര്‍ ഇതില്‍ നിന്ന് രക്ഷപ്പെടാനും തെരഞ്ഞെടുപ്പില്‍ വിജയിക്കുന്നതിനും വേണ്ടിയാണ് ഇത്തരത്തിലുള്ള ഒരു ബജറ്റ് തയാറാക്കിയതെന്നും ശിവസേന നേതാക്കള്‍ ആരോപിച്ചു. കാര്‍ഷിക മേഖലയുടെ ഉന്നമനം ലക്ഷ്യം വയ്ക്കുന്നുണ്ടെങ്കിലും കാലാവസ്ഥാ വ്യതിയാനത്തെ തുടര്‍ന്ന് വിളകള്‍ നശിച്ചാല്‍ കര്‍ഷകര്‍ക്ക് നഷ്ടപരിഹാരം നല്‍കാനോ വായ്പ എഴുതി തള്ളാനോ ബജറ്റില്‍ പ്രത്യേക പരാമര്‍ശങ്ങളൊന്നുമില്ലെന്ന് ശിവസേനാ എം.പി അരവിന്ദ് സാവന്ദ് പറഞ്ഞു.