കാവനൂര്‍: കാവനൂരില്‍ ടൗണില്‍ രണ്ട് കടകളില്‍ മോഷണം. ടൗണ്‍ ജുമുഅ മസ്ജിദിനു എതിര്‍വശത്തുള്ള പല്ലാരാസ് ബേക്കറി, കെ.കെ.സി ട്രഡേഴ്‌സ് എന്നീ കടകളിലാണ് മോഷണം നടന്നത്. മോഷ്ടാവിന്റെ ചിത്രം സി.സി.ടി.വി ക്യാമറയില്‍ പതിഞ്ഞിട്ടുണ്ട്. ശനിയാഴ്ച്ച രാത്രി 2.40നാണ് മോഷണം നടന്നതെന്നാണ് സി.സി.ടി.വി ദ്യശ്യങ്ങള്‍ വ്യക്തമാക്കുന്നത്. ഷട്ടര്‍ പൂട്ടിയിരുന്ന താഴുകള്‍ തകര്‍ത്താണ് മോഷ്ടാവ് അകത്ത് കടന്നത്.
പല്ലാരാസ് ബേക്കറിയില്‍ നിന്നും എഴുപതിനായിരത്തോളം രൂപയും, കെ.കെ.സി ട്രഡേഴ്‌സില്‍ നിന്നും ഇരുപതിനായിരം രൂപയോളം വിലമതിക്കുന്ന കുരുമുളകും അടക്കയും കൊണ്ട് പോയിട്ടുണ്ട്.
രാത്രി ഒന്നിനാണ് കട അടച്ചത്. മണിക്കൂറുകള്‍ക്കകം തന്നെ മോഷണം നടന്നിട്ടുണ്ട്.
കെ.കെ.സി ട്രഡേഴ്‌സ് കഴിഞ്ഞ ദിവസം തുറന്നിറുന്നില്ല. അരീക്കോട് പൊലിസും മലപ്പുറത്തു നിന്നെത്തിയ വിരലടയാള വിദഗ്ധരും കടകളിലും പരിസരത്തും പരിശോധന നടത്തി. മോഷണം തുടരാതിരിക്കാന്‍ പ്രദേശത്ത് നൈറ്റ് പെട്രോളിങ് ശക്തമാക്കണമെന്നാണ് നാട്ടുകാര്‍ പറയുന്നത്.