കല്‍പ്പറ്റ: ആനക്കൊമ്പുകളുമായി നാല് യുവാക്കള്‍ വനംവകുപ്പ് ഫ്‌ളയിങ് സ്‌ക്വാഡിന്റെ പിടിയിലായി. കല്‍പ്പറ്റ ബൈപ്പാസില്‍ കഴിഞ്ഞ ദിവസം നടത്തിയ വാഹന പരിശോധനയിലാണ് 2.600 ഗ്രാം തൂക്കംവരുന്ന രണ്ട് കൊമ്പുകളുമായി മേപ്പാടി കാപ്പംകൊല്ലി സ്വദേശികളായ സി.എം ജുനൈദ്(18), പി.എ സവാദ്(19), ഇ.പി സിയാസ് അലി(19), എം സുഭാഷ്(26) എന്നിവര്‍ പിടിയിലായത്. ആനക്കൊമ്പുകള്‍ വില്‍ക്കാനായി യുവാക്കള്‍ കാറില്‍ വരുന്നുണ്ടെന്ന് വനംവകുപ്പിന് രഹസ്യവിവരം ലഭിച്ചിരുന്നു.
തുടര്‍ന്ന് ആവശ്യക്കാരെന്ന നിലയില്‍ വനംവകുപ്പ് ഉദ്യോഗസ്ഥര്‍ യുവാക്കളെ ബന്ധപ്പെടുകയും മൂന്നുപേരെയും കസ്റ്റഡിയില്‍ എടുക്കുകയുമായിരുന്നെന്ന് ഫ്‌ളയിങ് സ്‌ക്വാഡ് റെയ്ഞ്ചര്‍ എം പത്മനാഭന്‍ പറഞ്ഞു. കാര്‍ പരിശോധിച്ചപ്പോഴാണ് കൊമ്പുകള്‍ കണ്ടെത്തിയത്. കല്‍പ്പറ്റ ഫോറസ്റ്റ് ഓഫിസിലെത്തിച്ച യുവാക്കളെ ചോദ്യം ചെയ്തതോടെ സുഭാഷ് എന്നയാള്‍ വില്‍ക്കാനേല്‍പ്പിച്ചതാണെന്നാണ് ആനക്കൊമ്പെന്ന് ഇവര്‍ മൊഴിനല്‍കി. യുവാക്കളുടെ മൊഴിയുടെ അടിസ്ഥാനത്തില്‍ വനംവകുപ്പ് സംഘം സുഭാഷിനെയും കസ്റ്റഡിയിലെടുത്തു.
50 ലക്ഷം രൂപക്ക് വില്‍ക്കാനായാണ് ആനക്കൊമ്പ് സുഭാഷ് മറ്റുള്ളവരെ ഏല്‍പ്പിച്ചത്. കച്ചവടം നടന്നാല്‍ 10 ലക്ഷം രൂപ ഇവര്‍ക്ക് കമ്മിഷനായി നല്‍കാമെന്നായിരുന്നു ധാരണയെന്നും വനംവകുപ്പ് ഉദ്യോഗസ്ഥര്‍ പറഞ്ഞു. സുഭാഷിന്റെ വീട്ടില്‍ വര്‍ഷങ്ങളായി സൂക്ഷിച്ചിരുന്ന കൊമ്പുകളാണിതെന്ന് ചോദ്യംചെയ്യലില്‍ ഇയാള്‍ പറഞ്ഞതായും വനംവകുപ്പ് അധികൃതര്‍ പറഞ്ഞു.
1.416 കിലോഗ്രാമും 1.220 കിലോഗ്രാമും തൂക്കമുള്ള രണ്ട് കൊമ്പുകളാണ് ഇവരില്‍ നിന്ന് കണ്ടെടുത്തത്. ഫ്‌ളയിങ് സ്‌ക്വാഡ് റെയ്ഞ്ചര്‍ക്ക് പുറമെ ഫോറസ്റ്റര്‍മാരായ കെ.പി ശ്രീജിത്ത്, കെ.ഐ.എം ഇഖ്ബാല്‍, പി.കെ ജീവരാജ്, ബീറ്റ് ഫോറസ്റ്റ് ഓഫിസര്‍ പി രാജു, കെ.ടി മനോജ് എന്നിവരടങ്ങിയ സംഘമാണ് യുവാക്കളെ തൊണ്ടിമുതലുമായി പിടികൂടിയത്. കോടതിയില്‍ ഹാജരാക്കിയ പ്രതികളെ 14 ദിവസത്തേക്ക് റിമാന്‍ഡ് ചെയ്തു.