തിരുവനന്തപുരം: ട്രെയിന്‍ യാത്രക്കിടെ അപമാനിക്കാന്‍ ശ്രമിച്ചയാളെ നിയമത്തിനു മുന്നിലെത്തിക്കാന്‍ ധൈര്യം കാണിച്ച നടി സനൂഷക്ക് ഡി.ജി.പിയുടെ ആദരം. ഇന്നലെ പൊലിസ് ഹെഡ്ക്വാര്‍ട്ടേഴ്‌സില്‍ സ്വീകരണം നല്‍കിയാണ് സനൂഷയെ ഡി.ജി.പി ആദരിച്ചത്. സനൂഷ കാണിച്ച ധൈര്യം മാതൃകാപരമാണെന്നും പൊലിസ് സ്ത്രീസുരക്ഷക്ക് ഏറെ പ്രാധാന്യം നല്‍കുന്നുണ്ടെന്നും ഇത്തരം സംഭവങ്ങളുണ്ടായാല്‍ മടിച്ചു നില്‍ക്കാതെ പരാതിപ്പെടണമെന്നും ഡി.ജി.പി പറഞ്ഞു.
സമപ്രായക്കാരായ കൂടുതല്‍ പെണ്‍കുട്ടികള്‍ക്ക് ധൈര്യം നല്‍കുന്നതിനുള്ള പ്രവര്‍ത്തനങ്ങള്‍ക്ക് കൂട്ടായി ശ്രമിക്കണമെന്ന് ഡി.ജി.പി സനൂഷയോട് ആവശ്യപ്പെട്ടു. സംസ്ഥാന പൊലിസ് നല്‍കിയ പിന്തുണക്ക് സനൂഷ നന്ദി പറഞ്ഞു. കഴിഞ്ഞ ദിവസം മംഗലാപുരത്തുനിന്നു തിരുവനന്തപുരത്തേക്കുള്ള യാത്രക്കിടെ മാവേലി എക്‌സ്പ്രസിലാണ് സനൂഷയെ മറ്റൊരു യാത്രക്കാരന്‍ അപമാനിക്കാന്‍ ശ്രമിച്ചത്.