ജിദ്ദ: സഊദി എയര്‍ലൈന്‍സില്‍ യാത്ര ചെയ്യുന്നവര്‍ക്ക് ഇനി രണ്ടു ദിവസം മുമ്പ് ബോര്‍ഡിംഗ് പാസ് ലഭിക്കാനുള്ള സൗകര്യം ഉണ്ടാകും.

ഇന്നലെയാണ് ഈ സേവനം എയര്‍ലൈന്‍സ് ആരംഭിച്ചത്. യാത്ര പുറപ്പെടുന്നതിനു നാല്‍പ്പത്തിയെട്ട് മണിക്കൂര്‍ മുമ്പ് ബോര്‍ഡിംഗ് പാസ് ഇഷ്യൂ ചെയ്യാനുള്ള സൗകര്യമാണ് സഊദി അറേബ്യന്‍ എയര്‍ലൈന്‍സ് ഒരുക്കിയിരിക്കുന്നത്.

സെല്‍ഫ് സര്‍വിസ് വഴിയാണ് ഈ സേവനം ലഭ്യമാകുക. ഓണ്‍ലൈന്‍ വഴിയോ സഊദി എയര്‍ലൈന്‍സ് ഏര്‍പ്പെടുത്തിയിട്ടുള്ള പ്രത്യേക മെഷിനുകള്‍ വഴിയോ ഈ സേവനം ലഭിക്കും.

ഇതുവരെ ഇരുപത്തിനാല് മണിക്കൂര്‍ മുമ്പ് മാത്രമേ ബോര്‍ഡിംഗ് പാസ് ഇഷ്യൂ ചെയ്യാന്‍ സാധിക്കുമായിരുന്നുള്ളൂ. ഓണ്‍ലൈന്‍ വഴിയുള്ള ബുക്കിങ്ങും, ബോര്‍ഡിംഗ് പാസ് ഇഷ്യൂ ചെയ്യുന്നതും വന്‍തോതില്‍ വര്‍ധിച്ച സാഹചര്യത്തിലാണ് ഈ മാറ്റമെന്ന് സഊദി എയര്‍ലൈന്‍സ് ഡെപ്യൂട്ടി ഡയരക്ടര്‍ ജനറല്‍ അബ്ദുറഹ്മാന്‍ അല്‍ തയ്യിബ് പറഞ്ഞു.

അതേസമയം ആഭ്യന്തര വിമാനക്കമ്പനിയായ ഫ്‌ലൈഅദീല്‍ ഈ വര്‍ഷാവസാനത്തോടെ അന്ത്രാരാഷ്ട്ര സര്‍വിസുകള്‍ ആരംഭിക്കുമെന്ന് മാനെജ്‌മെന്റ് അറിയിച്ചു.

വര്‍ഷത്തില്‍ മുപ്പതുലക്ഷത്തിലധികം സീറ്റുകളാണ് കമ്പനി ലക്ഷ്യമിടുന്നത്. ഈ സേവനത്തിനായി എട്ടു പുതിയ വിമാനങ്ങള്‍ കമ്പനി വാങ്ങുമെന്നും മാനെജ്‌മെന്റ് അറിയിച്ചു.