തിരുവനന്തപുരം: ദിവസങ്ങള്‍ നീണ്ട വിദ്യാര്‍ഥി സമരത്തിനുശേഷം ലോ അക്കാദമി ഇന്നലെ തുറന്നു. സമരവിജയത്തിന്റെ ആഘോഷപ്രകടനം തന്നെയായിരുന്നു ആദ്യദിനത്തിന്റെ സവിശേഷത.
രാവിലെ 10.30തോടെ പേരൂര്‍ക്കട ജങ്ഷനിലേക്ക് റാലി നടത്തിയ വിദ്യാര്‍ഥികള്‍ അക്കാദമി മുറ്റത്ത് വിജയനൃത്തം ചവിട്ടി. ബാന്റുസെറ്റിന്റെ അകമ്പടിയോടെയായിരുന്നു വിജയാഹ്ലാദം. കെ.എസ്.യു, എ.ഐ.എസ്.എഫ്, എം.എസ്.എഫ്, എ.ബി.വി.പി സംഘടനകളുടെ സംയുക്ത വിദ്യാര്‍ഥി ഐക്യം ഒരുഭാഗത്തും എസ്.എഫ്.ഐ തനിച്ച് മറുഭാഗത്തും വെവ്വേറയാണ് വിജയം ആഘോഷിച്ചത്.
ലക്ഷ്മി നായര്‍ക്ക് പകരം പുതിയ പ്രിന്‍സിപ്പലിനെ നിയമിക്കാത്തതിനാല്‍ വൈസ് പ്രിന്‍സിപ്പല്‍ ദാമോദരന്‍ പോറ്റിക്കാണ് പ്രിന്‍സിപ്പലിന്റെ ചുമതല. കോളജ് ഡയറക്ടര്‍ നാരായണന്‍ നായരും സന്നിഹിതനായിരുന്നു. രക്ഷിതാക്കളുടെ യോഗം ഇന്ന് ഉച്ചയ്ക്ക് രണ്ടിന് കോളജില്‍ ചേരും.