മുംബൈ: സയ്യിദ് മുഷ്താഖ് അലി ഇന്റര്‍ സോണല്‍ ടി20 പോരാട്ടങ്ങളില്‍ പശ്ചിമ മേഖലയ്ക്കും പൂര്‍വ മേഖലയ്ക്കും വിജയം. ഉത്തര മേഖലയെ എട്ടു വിക്കറ്റിനു കീഴടക്കിയാണു പശ്ചിമ മേഖല വിജയിച്ചത്. മധ്യ മേഖലക്കെതിരേ ഏഴു വിക്കറ്റിനാണു പൂര്‍വ മേഖല വിജയിച്ചത്.
പശ്ചിമ മേഖലക്കെതിരേ ആദ്യം ബാറ്റു ചെയ്ത ഉത്തര മേഖല എട്ടു വിക്കറ്റ് നഷ്ടത്തില്‍ 107 റണ്‍സ് മാത്രമാണു സ്‌കോര്‍ ചെയ്തത്. നാലോവറില്‍ പത്തു റണ്‍സ് മാത്രം വഴങ്ങി മൂന്നു വിക്കറ്റ് വീഴ്ത്തിയ മുന്‍ ഇന്ത്യന്‍ താരം ഇര്‍ഫാന്‍ പത്താന്റെ മിന്നും ബൗളിങാണു ഉത്തര മേഖലയെ വെട്ടിലാക്കിയത്. 60 റണ്‍സെടുത്ത ഓപണര്‍ ഗൗതം ഗംഭീര്‍ മാത്രമാണു പിടിച്ചു നിന്നത്. വിജയിക്കാനാവശ്യമായ 108 റണ്‍സ് 12.4 ഓവറില്‍ രണ്ടു വിക്കറ്റ് നഷ്ടത്തില്‍ പശ്ചിമ മേഖല അടിച്ചെടുത്തു.
പൂര്‍വ മേഖലയ്‌ക്കെതിരേ ആദ്യം ബാറ്റു ചെയ്ത മധ്യ മേഖല ഏഴു വിക്കറ്റ് നഷ്ടത്തില്‍ 151 റണ്‍സെടുത്തു. വിജയം തേടിയിറങ്ങിയ പൂര്‍വ മേഖല 17.1 ഓവറില്‍ മൂന്നു വിക്കറ്റ് നഷ്ടത്തില്‍ 154 റണ്‍സെടുത്തു വിജയിക്കുകയായിരുന്നു.