മാഡ്രിഡ്: ത്രില്ലര്‍ പോരാട്ടത്തില്‍ സെല്‍റ്റ വിഗോയെ കീഴടക്കി അത്‌ലറ്റിക്കോ മാഡ്രിഡ് സ്പാനിഷ് ലാ ലിഗയില്‍ വിജയം സ്വന്തമാക്കി. രണ്ടിനെതിരേ മൂന്നു ഗോളുകള്‍ക്കാണു സിമിയോണിയുടെ കുട്ടികള്‍ വിജയം പിടിച്ചത്. സ്വന്തം തട്ടകത്തില്‍ നടന്ന പോരാട്ടത്തിന്റെ അഞ്ചാം മിനുട്ടില്‍ തന്നെ ഗോള്‍ വഴങ്ങി പരുങ്ങിയ അത്‌ലറ്റിക്കോയെ 11ാം മിനുട്ടില്‍ ഫെര്‍ണാണ്ടോ ടോറസ് ഒപ്പമെത്തിച്ചു. നായകനായി മാറിയ ടോറസ് അല്‍പ സമയത്തിനുള്ളില്‍ തന്നെ പെനാല്‍റ്റി നഷ്ടപ്പെടുത്തി വില്ലനായി. 78ാം മിനുട്ടില്‍ നേടിയ ഗോളിലൂടെ സെല്‍റ്റ അത്‌ലറ്റിക്കോയെ 2-1നു പിന്നിലാക്കുകയും ചെയ്തു. തോല്‍വി മുന്നില്‍ കണ്ട അത്‌ലറ്റിക്കോ പക്ഷേ രണ്ടു മിനുട്ടിനിടെ രണ്ടു ഗോളുകള്‍ വലയിലെത്തിച്ച് വിജയം സ്വന്തമാക്കുകയായിരുന്നു. 86ാം മിനുട്ടില്‍ കാരസ്‌ക്കോയും 88ാം മിനുട്ടില്‍ അന്റോയിന്‍ ഗ്രിസ്മാനുമാണു അവര്‍ക്കായി വല ചലിപ്പിച്ചത്. ജയത്തോടെ 42 പോയിന്റുകളുമായി അത്‌ലറ്റിക്കോ നാലാം സ്ഥാനത്ത്.
യുവന്റസ് മുന്നോട്ട്
മിലാന്‍: ഇറ്റാലിയന്‍ സീരി എയില്‍ ചാംപ്യന്‍ ടീം യുവന്റസ് മുന്നേറ്റം തുടരുന്നു. മറുപടിയില്ലാത്ത രണ്ടു ഗോളുകള്‍ക്ക് അവര്‍ കഗ്ലിയാരിയെ വീഴ്ത്തി വിജയം സ്വന്തമാക്കി. ഗോണ്‍സാലോ ഹിഗ്വയ്ന്‍ നേടിയ ഇരട്ട ഗോളുകളാണു യുവന്റസിനെ വിജയിപ്പിച്ചത്.