കൊല്ലം: സോളാര്‍ കേസുമായി ബന്ധപ്പെട്ട സുപ്രധാന രേഖകള്‍ കാണാനില്ലെന്ന് പത്തനംതിട്ട ജില്ലാ ജയില്‍ സൂപ്രണ്ട് കൊട്ടാരക്കര കോടതിയില്‍ മൊഴി നല്‍കി. സരിത എസ്. നായര്‍ സോളാര്‍ കമ്മിഷന്‍ മുന്‍പാകെ ഹാജരാക്കിയ കത്ത് കെ.ബി ഗണേഷ്‌കുമാര്‍ എം.എല്‍.എയും സരിതയും മറ്റു ചിലരും ചേര്‍ന്ന് നടത്തിയ ഗൂഢാലോചനയാണെന്നാരോപിച്ച് കൊല്ലം ജില്ലാ മുന്‍ ഗവണ്‍മെന്റ് പ്ലീഡറും പബ്ലിക് പ്രോസിക്ക്യൂട്ടറുമായിരുന്ന സുധീര്‍ ജേക്കബ് കൊട്ടാരക്കര ജ്യുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി മുന്‍പാകെ സമര്‍പ്പിച്ച ഹര്‍ജിയിലാണ് ജയില്‍ സൂപ്രണ്ട് മൊഴി നല്‍കിയത്.
സോളാര്‍ കേസില്‍ സരിത എസ്. നായരെ 2013 ജൂലൈ മൂന്നിന് പെരുമ്പാവൂര്‍ പൊലിസ് അറസ്റ്റ് ചെയ്തിരുന്നു.
20ന് സരിതയെ എറണാകുളം എ.സി.ജെ.എം കോടതി ഉത്തരവ് പ്രകാരം പത്തനംതിട്ട ജില്ലാ ജയിലില്‍ പ്രവേശിപ്പിക്കുന്ന സമയം തടവുകാര്‍ക്ക് നടത്താറുള്ള ദേഹപരിശോധനയില്‍ ഒരു കത്ത് കണ്ടെടുത്തു.
തുടര്‍ന്ന് ജയിലധികൃതര്‍ ചോദ്യം ചെയ്തപ്പോള്‍ കേസ് നടത്തിപ്പിലേക്ക് അഭിഭാഷകനെ ഏല്‍പ്പിക്കാനുള്ള കത്താണെന്ന് പറഞ്ഞതോടെ ജയില്‍ രേഖകളില്‍ ഉള്‍പ്പെടുത്തി സരിതയെത്തന്നെ കത്ത് തിരികെ ഏല്‍പ്പിക്കുകയായിരുന്നു.
നാലുദിവസം കഴിഞ്ഞ് സരിതയുടെ അഭിഭാഷകനായ ഫെന്നി ബാലകൃഷ്ണന്‍ ജയില്‍ സന്ദര്‍ശിച്ചപ്പോള്‍ ജയില്‍ അധികാരികളുടെ സാന്നിധ്യത്തില്‍ നിയമപരമായി 21 പേജുള്ള കത്ത് എണ്ണി തിട്ടപ്പെടുത്തി ഫെന്നി ബാലകൃഷ്ണന് കൈമാറി. 21 പേജ് എന്ന് കാണിച്ചിട്ടുള്ള കൈപ്പറ്റു രസീത് ജയില്‍ അധികൃതരുടെ ആവശ്യപ്രകാരം നല്‍കുകയും രസീത് ജയില്‍ രേഖകളില്‍ സൂക്ഷിക്കുകയും ചെയ്തു.
സോളാര്‍ കമ്മിഷന്റെ വിസ്താര വേളയില്‍ കമ്മിഷന്റെ റെക്കോര്‍ഡുകളില്‍ രേഖപ്പെടുത്തിയ ശേഷം പത്തനംതിട്ട ജില്ലാ ജയില്‍ രേഖകളില്‍ സൂക്ഷിക്കുന്നതിലേക്കായി സൂപ്രണ്ട് തന്നെ നേരിട്ട് തിരികെ വാങ്ങിയ റെക്കോര്‍ഡുകളാണ് ഇപ്പോള്‍ കാണാതായത്. ഇതേക്കുറിച്ച് കോടതി ആരാഞ്ഞപ്പോള്‍ ജയില്‍ സൂപ്രണ്ടായി മുന്‍പ് സേവനം അനുഷ്ടിച്ചയാള്‍ നിയമപരമായി തനിക്ക് മേല്‍രേഖകള്‍ കൈമാറിയിട്ടില്ലെന്നാണ് പുതിയ സൂപ്രണ്ടിന്റെ മൊഴി.ജയില്‍ രേഖകളില്‍ ഒറിജിനല്‍ രേഖയുടെ ഫോട്ടോകോപ്പി മാത്രമെയുള്ളു. സോളാര്‍ കേസുമായി ബന്ധപ്പെട്ട് കസ്റ്റഡിയില്‍ കഴിയുന്ന മറ്റു പ്രതികളുടെ എല്ലാ രേഖകളും ഇപ്പോഴും ജയിലില്‍ ലഭ്യമായിട്ടുണ്ടെന്നും സൂപ്രണ്ട് കോടതിയെ അറിയിച്ചു. കത്തു കൈമാറിയ ജൂലൈ 24ന് ഫെന്നി ബാലകൃഷ്ണന്‍ സരിതയെ സന്ദര്‍ശിച്ച രേഖകള്‍ ജയില്‍ സൂപ്രണ്ട് ഹാജരാക്കി.
കേസ് വരുന്ന 24ലേക്ക് വിചാരണക്കായി മാറ്റിവച്ചിരിക്കയാണ്. കേസില്‍ ഉമ്മന്‍ചാണ്ടി നേരിട്ട് ഹാജരാകുമെന്നും സോളാര്‍ കമ്മിഷന്‍ മുന്‍പാകെ സരിത ഹാജരാക്കിയ കത്തിന്റെ ഒറിജിനല്‍ ലഭ്യമാക്കണമെന്നും ആഭ്യന്തര സെക്രട്ടറിക്ക് കൊട്ടാരക്കര കോടതി നിര്‍ദേശം നല്‍കി. കേസിലെ സുപ്രധാനമായ രേഖകള്‍ കാണാതായ വിഷയത്തില്‍ വിജിലന്‍സ് അന്വേഷണം ഉള്‍പ്പടെയുള്ള നടപടികള്‍ സ്വീകരിക്കണമെന്നും സുധീര്‍ ജേക്കബ്ബ് പറഞ്ഞു.