വാഷിങ്ടണ്‍: റഷ്യയുടെ ആണവ തന്ത്രങ്ങളില്‍ അമേരിക്കയ്ക്ക് കടുത്ത ആശങ്ക. ഇതേതുടര്‍ന്ന് സ്വന്തം ആണവശേഷി വര്‍ധിപ്പിക്കാനുള്ള ഒരുക്കത്തിലാണ് യു.എസ് ഭരണകൂടം. കഴിഞ്ഞ ദിവസം ട്രംപ് ഭരണകൂടം പുറത്തിറക്കിയ നയരേഖയിലാണ് ഇക്കാര്യം വ്യക്തമാക്കുന്നത്.
റഷ്യയും അമേരിക്കയും തമ്മിലുള്ള ബന്ധത്തില്‍ പുതിയ മാനങ്ങളുള്ളതാണു പുതിയ നീക്കം. റഷ്യയില്‍നിന്നുള്ള ഭീഷണി തടയാനായി അടുത്തിടെയായി ട്രംപ് ഭരണകൂടം നിലപാട് ശക്തമാക്കുന്നതായി അടുത്തിടെ സൂചനയുണ്ടായിരുന്നു. റഷ്യയും ട്രംപ് ഭരണകൂടവും തമ്മില്‍ രഹസ്യബന്ധമുണ്ടെന്ന ആരോപണങ്ങള്‍ക്കിടെയാണു പുതിയ നീക്കം. ഉത്തര കൊറിയയുടെ ആണവ ഭീഷണിയെ ചെറുക്കാനായും അമേരിക്ക അടുത്തിടെ റഷ്യന്‍വൃത്തങ്ങളുമായി ചര്‍ച്ച നടത്തിയിരുന്നു.
ഐ.എസ്, താലിബാന്‍, അല്‍ ഖാഇദ തുടങ്ങിയ ഭീകരസംഘങ്ങള്‍ക്കെതിരായ പോരാട്ടത്തില്‍നിന്ന് താല്‍ക്കാലികമായി പെന്റഗണ്‍ റഷ്യയ്‌ക്കെതിരായ പടയൊരുക്കത്തിലേക്കു ശ്രദ്ധ തിരിച്ചതായും വാര്‍ത്തയുണ്ട്. ചൈനയും റഷ്യയും അമേരിക്കയ്ക്ക് വന്‍ ഭീഷണിയായി വളര്‍ന്നുകൊണ്ടിരിക്കുകയാണെന്ന് അടുത്തിടെ യു.എസ് വൃത്തങ്ങള്‍ സമ്മതിച്ചിരുന്നു.
ന്യൂക്ലിയര്‍ പോസ്ചര്‍ റിവ്യു എന്ന പേരിലാണ് നയരേഖ തയാറാക്കിയിരിക്കുന്നത്. എത്ര ചെറിയ തോതിലാണെങ്കിലും ആണവായുധങ്ങള്‍ ഉപയോഗിക്കുന്നത് അസ്വീകാര്യമാണെന്ന് റഷ്യയെ ബോധ്യപ്പെടുത്തുകയാണു തങ്ങളുടെ ലക്ഷ്യമെന്ന് രേഖയില്‍ പറയടുന്നു.
യു.എസ് പുറത്തുവിട്ട നയരേഖ നിരാശാജനകമാണെന്ന് റഷ്യന്‍ വിദേശകാര്യ മന്ത്രാലയം പ്രതികരിച്ചു. റഷ്യന്‍ വിരുദ്ധ മനോഭാവവും സംഘട്ടന സ്വഭാവവുമാണ് ഇതിനുള്ളതെന്നും മന്ത്രാലയം പ്രസ്താവനയില്‍ പറഞ്ഞു. 'വാഷിങ്ടണ്‍ പുതുതായി കൈക്കൊണ്ട സമീപനം ഞങ്ങള്‍ കണക്കിലെടുക്കുന്നു. റഷ്യയുടെ സുരക്ഷയ്ക്ക് ആവശ്യമായ നടപടികള്‍ ഉടന്‍ തന്നെ കൈക്കൊള്ളും'-പ്രസ്താവന വ്യക്തമാക്കി. നയരേഖയില്‍ റഷ്യക്കെതിരായി ഉന്നയിച്ച ആരോപണങ്ങളെ മന്ത്രാലയം തള്ളിക്കളഞ്ഞു.