മട്ടന്നൂര്‍: മട്ടന്നൂര്‍ -കണ്ണൂര്‍ സംസ്ഥാന പാതയിലെ എടയന്നൂര്‍ വളവ് അപകടഭീഷണിയുയര്‍ത്തുന്നു. സ്‌കൂള്‍ പരിസരത്തെ കൊടുംവളവ് സ്‌കൂള്‍ വിദ്യാര്‍ഥികളിലും യാത്രക്കാരിലും ഭീതിയിലാഴ്ത്തിയിരിക്കുകയാണ്. ബസുകളുടെ മത്സര ഓട്ടവും മറ്റു വാഹനങ്ങളുടെ അമിത വേഗതയും മൂലം ഈ മേഖലയില്‍ അപകടം പതിവാണ്.കുത്തനയുള്ള ഇറക്കവും റോഡിന്റെ ഗതിയും അപകടം വര്‍ധിക്കാന്‍ കാരണമാകുന്നു .ഈ പരിസരത്തുള്ള സീബ്ര ലൈന്‍ അപ്രത്യക്ഷമായിട്ട് വര്‍ഷങ്ങളായി. ഇത് മൂലം വഴി യാത്രക്കര്‍ക്കും വിദ്യാര്‍ഥികള്‍ക്കും റോഡ് മുറിച്ചുകടക്കാന്‍ ഏറെസമയമെടുക്കും.
വാഹനങ്ങളുടെ വേഗത കുറക്കുന്നതിന് നാട്ടുകാരും സ്‌കൂള്‍ അധികാരികളും ചേര്‍ന്ന് ബസ് സ്‌റ്റോപ്പിനു അപേക്ഷിച്ചിട്ട് മാസങ്ങളായി .എന്നാല്‍ ആവശ്യമായ നടപടി എടുക്കാന്‍ അധികൃതര്‍ ഇതുവരെ തയാറായിട്ടില്ല . രണ്ടു കിലോ മീറ്ററിനുള്ളില്‍ അഞ്ചോളം സ്റ്റോപ്പുകള്‍ ഉണ്ടെങ്കിലും എല്ലാം നാമമാത്രമാണ്. മുസ്ലിം പള്ളിയും മത സ്ഥാപനവും ഗവണ്‍മെന്റ് ഡിസ്‌പെന്‍സറിയും പ്രവര്‍ത്തിക്കുന്നതിനാല്‍ അതി രാവിലെ മുതല്‍ തന്നെ ധാരാളം ആളുകളാണ് ഈ പരിസരത്തിലൂടെ യാത്ര ചെയ്യുന്നത് . പ്രദേശത്തെ ഒരു ക്ലബ്ബിന്റെ നേതൃത്വത്തില്‍ സ്ഥാപിച്ച ഒരു സൂചന ബോര്‍ഡില്ലാതെ മറ്റു രീതിയിലുള്ള അടയാളപ്പെടുത്തലുകള്‍ ഒന്നുമില്ലത്തത് അപകടം വര്‍ധിക്കാന്‍ കാരണമാകുന്നു.