തളിപ്പറമ്പ്: തട്ടുകടയില്‍ ചായ കുടിക്കുന്നതിനിടെ ഉണ്ടായ വാക്കുതര്‍ക്കം സംഘട്ടനത്തില്‍ കലാശിച്ചു എസ്.ഡി.പി.ഐ മണ്ഡലം സെക്രട്ടറിക്ക് ഗുരുതരപരിക്ക്. സംഭവവുമായി ബന്ധപ്പെട്ട് രണ്ട് ചെമ്പേരി സ്വദേശികളെ പൊലിസ് കസ്റ്റഡിയിലെടുത്തു.
ഇന്നലെ രാത്രി എട്ടരയോടെ തളിപ്പറമ്പ് താലൂക്ക് ആശുപത്രിക്ക് സമീപത്തെ തട്ടുകടയിലാണ് അക്രമമുണ്ടായത്. ചെമ്പേരിയിലെ ആനിത്തോട്ടത്തില്‍ ഷാജി(31), കുന്നേല്‍ സജു(27) എന്നിവരെ തളിപ്പറമ്പ് എസ്.ഐ പി.എ ബിനുമോഹന്‍ കസ്റ്റഡിയിലെടുത്തു. തട്ടുകടയില്‍ ചായ കുടിക്കുന്നതിനിടെ അവിടെയത്തിയ ഇബ്രാഹിം എന്ന ഓട്ടോഡ്രൈവറും ഷാജിയും തമ്മില്‍ ഉണ്ടായ നിസാര പ്രശ്‌നമാണ് വാക്‌പോരിലും സംഘട്ടനത്തിലും കലാശിച്ചത്. ഇബ്രാഹിമിന്റെ സഹായത്തിനെത്തിയ എസ്.ഡി.പി.ഐ പ്രവര്‍ത്തകര്‍ ഷാജിയേയും സജുവിനേയും മര്‍ദിച്ചതോടെ തുറന്ന സംഘട്ടനമായി മാറി.
തലയ്ക്ക് മാരകമായി പരുക്കേറ്റ എസ്.ഡി.പി.ഐ മണ്ഡലം സെക്രട്ടറി സര്‍ സയ്യിദ് കോളജിന് സമീപത്തെ ഇര്‍ഷാദിനെ(24) പരിയാരം മെഡിക്കല്‍ കോളജില്‍ പ്രവേശിപ്പിച്ചു. സംഭവത്തെ തുടര്‍ന്ന് എസ്.ഡി.പി.ഐ പ്രവര്‍ത്തകര്‍ കരിമ്പത്ത് പ്രതിഷേധ പ്രകടനം നടത്തി.