കോഴിക്കോട്: വിവിധ കാരണങ്ങളാല്‍ പാര്‍ശ്വവല്‍ക്കരിക്കപ്പെട്ട അനാഥ-അഗതി ബാല്യങ്ങളെ പരിപാലിച്ചും പുനരധിവസിപ്പിച്ചും വരുന്ന ധര്‍മസ്ഥാപനങ്ങളെ തകര്‍ക്കുന്ന ജെ.ജെ ആക്ടിലെ പുതിയ വ്യവസ്ഥകള്‍ പിന്‍വലിക്കാനും സ്ഥാപന മേധാവികളുടെ ആശങ്കയകറ്റാനും സര്‍ക്കാര്‍ തയാറാകണമെന്ന് സമസ്ത കേരള മദ്‌റസ മാനേജ്‌മെന്റ് അസോസിയേഷന്‍ ജില്ലാ ലീഡേഴ്‌സ് പാര്‍ലമെന്റ് ആവശ്യപ്പെട്ടു.
എ.പി.പി തങ്ങള്‍ കാപ്പാട് അധ്യക്ഷനായി. സമസ്ത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ ഉദ്ഘാടനം ചെയ്തു.
മത വിദ്യാഭ്യാസത്തെ തകര്‍ക്കുംവിധം പൊതുവിദ്യാഭ്യാസ രംഗത്ത് കടന്നുവരുന്ന പുത്തന്‍ പ്രവണതകള്‍ക്കെതിരേ സമൂഹവും രക്ഷിതാക്കളും ജാഗ്രത പാലിക്കണം. കേരള മുസ്‌ലിം റോള്‍ മോഡല്‍ സൃഷ്ടിച്ചെടുക്കുന്നതില്‍ ഉലമാ-ഉമറാ കൂട്ടായ്മയുടെ പങ്ക് നിസ്തുലമാണെന്നും അദ്ദേഹം പറഞ്ഞു. പിണങ്ങോട് അബൂബക്കര്‍, ആസിഫ് ദാരിമി പുളിക്കല്‍ എന്നിവര്‍ വിഷയാവതരണം നടത്തി. കൊട്ടപ്പുറം അബ്ദുല്ല മാസ്റ്റര്‍, പുറങ്ങ് മൊയ്തീന്‍ മുസ്‌ലിയാര്‍ വിശിഷ്ടാതിഥികളായി.
ടി.കെ പരീക്കുട്ടി ഹാജി, വി. മോയിമോന്‍ ഹാജി എന്നിവരെ എം.ടി അബ്ദുല്ല മുസ്‌ലിയാര്‍ ആദരിച്ചു. കെ.പി കോയ, പി.കെ മാനു, മൊയ്തു ഹാജി പുതുപ്പാടി, പി. മാമുക്കോയ ഹാജി, എ.വി അബൂബക്കര്‍ മൗലവി, ടി. മൊയ്തു ഹാജി, വി.പി മുഹമ്മദ് മാസ്റ്റര്‍, കെ. മൊയ്തീന്‍ കുട്ടി, സി.എ ശുകൂര്‍ മാസ്റ്റര്‍ സംസാരിച്ചു.