ദുബൈ: രാജ്യാന്തര സംഘടിത കുറ്റകൃത്യങ്ങളിലും മയക്കുമരുന്ന് കടത്തിലും പങ്കുണ്ടെന്ന് ആരോപിക്കപ്പെടുന്ന ഒത്മാന്‍ എല്‍ ബല്ലൂട്ടിയെ അറസ്റ്റു ചെയ്തതായി ദുബൈ പൊലിസ് അറിയിച്ചു.

ബെല്‍ജിയന്‍ അധികൃതര്‍ പുറപ്പെടുവിച്ച അന്താരാഷ്ട്ര അറസ്റ്റ് വാറണ്ടിനെ തുടര്‍ന്ന് ആഭ്യന്തര മന്ത്രാലയവുമായി സഹകരിച്ച് ദുബൈ പൊലിസിന്റെ ജനറല്‍ ഡിപ്പാര്‍ട്ട്‌മെന്റ് ഓഫ് ക്രിമിനല്‍ ഇന്‍വെസ്റ്റിഗേഷനാണ് അറസ്റ്റ് നടത്തിയത്. ബെല്‍ജിയന്‍ പൗരനായ എല്‍ ബല്ലൂട്ടി ഇന്റര്‍പോളിന്റെ റെഡ് നോട്ടീസിലും യൂറോപോളിന്റെ ഡാറ്റാബേസിലും ഉള്‍പ്പെട്ടിട്ടുണ്ട്.

ഇത്തരം അഭ്യര്‍ത്ഥനകള്‍ക്കുള്ള കേന്ദ്ര അതോറിറ്റിയായ യുഎഇ നീതിന്യായ മന്ത്രാലയത്തിന്റെ അന്താരാഷ്ട്ര സഹകരണ വകുപ്പ് മുഖേനയാണ് വാറണ്ട് കൈമാറിയത്. ബെല്‍ജിയത്തിന് കൈമാറുന്നതുമായി ബന്ധപ്പെട്ട നിയമനടപടികള്‍ക്കായി എല്‍ ബല്ലൂട്ടിയെ ദുബൈ പബ്ലിക് പ്രോസിക്യൂഷന് കൈമാറി.