തിരുവനന്തപുരം: മാവോയിസ്റ്റ് വേട്ടയിലും ഭൂപരിഷ്‌കരണ നിയമവിവാദത്തിലും മുഖ്യമന്ത്രിയെ വീണ്ടും വിമര്‍ശിച്ച് സി.പി.ഐ. മാവോവാദി വേട്ടയില്‍ മുഖ്യമന്ത്രി പിണറായി വിജയന്‍ സംസാരിച്ചത് യു.പി മുഖ്യമന്ത്രി യോഗി ആദിത്യനാഥിനെപ്പോലെയാണെന്ന് സി.പി.ഐ അസിസ്റ്റന്റ് സെക്രട്ടറി കെ. പ്രകാശ് ബാബു പറഞ്ഞു.
മഞ്ചക്കണ്ടി മാവോയിസ്റ്റ് വേട്ടക്ക് ഉത്തരവാദികളായ പൊലിസ് മേധാവികള്‍ക്കെതിരേ കൊലക്കുറ്റത്തിന് കേസ് എടുക്കണമെന്ന് ആവശ്യപ്പെട്ട് മനുഷ്യാവകാശ സമിതി സെക്രട്ടേറിയറ്റിനു മുന്‍പില്‍ നടത്തിയ ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം.
മാവോയിസ്റ്റുകളെ വെടിവച്ച് വീഴ്ത്തിയ സംഭവത്തെക്കുറിച്ച് നിയമസഭയില്‍ മുഖ്യമന്ത്രി വായിച്ചത് പൊലിസ് എഴുതിക്കൊടുത്ത വിവരങ്ങളാണ്.
ലക്‌നൗവില്‍ 16 പേരെ വെടിവച്ചുകൊന്ന സംഭവത്തില്‍ ആദിത്യനഥും കര്‍ണാടകയില്‍ പൗരത്വ നിയമഭേദഗതിക്കെതിരേ രണ്ടുപേരെ വെടിവച്ചുകൊന്നപ്പോള്‍ മുഖ്യമന്ത്രി യദ്യൂരപ്പയും പറഞ്ഞത് ഇതേ അഭിപ്രായമാണ്.
കേരളത്തിന്റെ മുഖ്യമന്ത്രി പൊലിസ് എഴുതിക്കൊടുത്ത വിവരങ്ങളല്ല പറയേണ്ടത്. ഇക്കാര്യത്തില്‍ ഇടതുപക്ഷ നിലപാട് നഷ്ടപ്പെടാതെ മറുപടി പറയാനുള്ള ബാധ്യത മുഖ്യമന്ത്രിക്കുണ്ട്. അത് മുഖ്യമന്ത്രി പറയണം.
കോടതിയുടെ നിര്‍ദേശം പാലിച്ച് വെടിവയ്പ്പ് നടത്തിയ പൊലിസ് ഉദ്യോഗസ്ഥരുടെ പേരില്‍ നരഹത്യക്ക് കേസ് എടുക്കണം. ആ നടപടി സര്‍ക്കാര്‍ സ്വീകരിച്ചിട്ടില്ല. തണ്ടര്‍ ബോള്‍ട്ടിനെ ആദിവാസി മേഖലകളില്‍നിന്ന് പിന്‍വലിക്കണം.
പന്തീരാങ്കാവ് കേസില്‍ അലന്റെയും താഹയുടെയും പേരില്‍ യു.എ.പി.എ ചുമത്തിയത് കേരള പൊലിസാണ്. അവരെ ജയിലില്‍ അടച്ചിട്ട് നഗര മാവോവാദികളാണെന്ന് പറഞ്ഞതും ഭരണാധികാരികളാണ്.
ഇത്രയും ചെയ്തിട്ട് എന്‍.ഐ.എ കേസ് ഏറ്റെടുത്തതിനെ എതിര്‍ത്തിട്ട് കാര്യമില്ല. അട്ടപ്പാടിയില്‍ മണിവാസവം വെടിയേറ്റുവീണ ചിത്രം കാണുമ്പോള്‍ മനുഷ്യത്വമുള്ള ഏതൊരാള്‍ക്കും വേദന തോന്നും.
ഇരുകാലും നീരുവന്ന് വടികുത്തിനിന്ന മണിവാസകത്തെയാണ് പൊലിസ് നിഷ്ഠൂരമായി വെടിവച്ച് കൊന്നത്. നേരത്തെ നിലമ്പൂരിലും ലക്കിടിയിലും നടന്നതും പൊലിസ് വേട്ടയാണെന്ന് പ്രകാശ് ബാബു പറഞ്ഞു.
ഭൂപരിഷ്‌കരണ നിയമ വിവാദത്തിലും മുഖ്യമന്ത്രിക്കെതിരേ സി.പി.ഐ വീണ്ടും രംഗത്തെത്തി.
ഭൂപരിഷ്‌കരണ നിയമവിവാദത്തില്‍ പ്രതിപക്ഷത്തിന്റെ നിഷേധാത്മക സ്വരമാണ് മുഖ്യമന്ത്രിയുടേതെന്ന് സി.പി.ഐ നേതാവ് പന്ന്യന്‍ രവീന്ദ്രന്‍ ഒരഭിമുഖത്തില്‍ വ്യക്തമാക്കി.
അച്യുതമേനോനാണ് കേരളം കണ്ട മികച്ച മുഖ്യമന്ത്രി. കേരളം കണ്ട എല്ലാ വികസനത്തിന്റെയും ചുക്കാന്‍ പിടിച്ചത് അച്യുതമേനോന്‍ സര്‍ക്കാരാണെന്നും അദ്ദേഹം വ്യക്തമാക്കി.