അരൂര്‍:ബൈക്ക് യാത്രികനെ രക്ഷിക്കുന്നതിനിടെ മിനി ലോറി പാലത്തില്‍നിന്ന് താഴേക്ക് മറിഞ്ഞു.ഡ്രൈവര്‍ ആലപ്പുഴ കൂനംപുളിക്കല്‍ സുബൈര്‍ (45) അരമണിക്കൂര്‍ വാഹനത്തില്‍ കുടുങ്ങി.
അരൂര്‍ പൊലിസ് സ്ഥലത്തെത്തിയാണ് രക്ഷപ്പെടുത്തിയത്.നിസാര പരുക്കുകളുള്ള ഇയാളെ സമീപത്തുള്ള സ്വകാര്യ ആശുപത്രിയില്‍പ്രഥമ ചികിത്സ നല്‍കിയ ശേഷം വിട്ടയച്ചു.ചന്തിരൂര്‍ അല്‍ അമീന്‍ സ്‌ക്കുളിനു സമീപം ദേശീയപാതയില്‍ ശനിയാഴ്ച രാത്രി 12 മണിയോടെയാണ് അപകടം നടന്നത്.
സി.പി.എസ്. ലോജിസ്റ്റിക്‌സന്റേതാണ് മിനി ലോറി.കരുനാഗപ്പള്ളിയില്‍നിന്ന് കാക്കനാട്ട് സെസ്സിലേക്ക് പോകുകയായിരുന്നു ലോറി.പതിനൊന്ന് മണിയോടെ ക്രെയിനെത്തിയാണ് വാഹനം പൊക്കിയത്. ദേശീയപാതയിലൂടെ പോകുന്ന വാഹനങ്ങള്‍ക്ക് അല്‍ അമീന്‍ സ്‌ക്കുളിനു സമീപത്തുനിന്ന് റോഡിലേക്ക് വരുന്ന വാഹനങ്ങള്‍ കാണാന്‍ പറ്റാത്തവിധം ഒരു മരവും അതിനു സമീപത്തായി ഒരു പെട്ടിക്കടയും ഉണ്ട്.ഇത് മൂലം ഇവിടെ അപകടം ഒരു പതിവു കാഴ്ചയാണ്. ഇതിനുമുന്‍പും ഈ പ്രദേശത്ത് നിരവധി വാഹനങ്ങള്‍ അപകടത്തില്‍ പെട്ടിട്ടുണ്ട്.