ന്യൂഡല്‍ഹി: ഡല്‍ഹി കലാപത്തില്‍ കൊല്ലപ്പെട്ട പൊലിസ് ഹെഡ് കോണ്‍സ്റ്റബിള്‍ രത്തന്‍ലാലിന് രക്തസാക്ഷി പദവി നല്‍കണമെന്നാവശ്യപ്പെട്ടുകൊണ്ട് നാട്ടുകാരുടെ പ്രതിഷേധം. രത്തന്‍ലാലിന്റെ സ്വദേശമായ രാജസ്ഥാനിലെ സാദിന്‍സറിലാണ് പ്രതിഷേധം. രക്തസാക്ഷി പദവി നല്‍കുന്നതുവരെ മൃതദേഹം സംസ്‌കരിക്കില്ലെന്ന നിലപാടിലാണ് ബന്ധുക്കളും നാട്ടുകാരും. ഡല്‍ഹിയില്‍ നടന്ന സംഘര്‍ഷത്തില്‍ കല്ലേറില്‍ പരുക്കേറ്റതിനെ തുടര്‍ന്നാണ് ഹെഡ് കോണ്‍സ്റ്റബിള്‍ രത്തന്‍ലാല്‍ കൊല്ലപ്പെട്ടത്.

ഉന്നത ഉദ്യോഗസ്ഥരുടെ നേതൃത്വത്തില്‍ ബന്ധുക്കളേയും നാട്ടുകാരേയും പിന്‍തിരിപ്പിക്കാനുള്ള ശ്രമം തുടരുകയാണ്. ഇന്നലെ രത്തന്‍ലാലിന്റെ ബന്ധുക്കളെ സന്ദര്‍ശിക്കാനെത്തിയ മുഖ്യമന്ത്രി കെജ്‌രിവാളിന് നേരെ പ്രതിഷേധം ഉയര്‍ന്നിരുന്നു.ആഭ്യന്തര മന്ത്രി അമിത് ഷാ കൊല്ലപ്പെട്ട രത്തന്‍ലാലിന്റെ ഭാര്യക്ക് കത്ത് അയച്ചിരുന്നു. അദ്ദേഹം ധീരമനായിരുന്നു എന്നാണ് അമിത് ഷാ രത്തന്‍ലാലിനെ കുറിച്ച് പറഞ്ഞത്.ജോലിക്കിടെ മഹത്തായ ത്യാഗമാണ് അദ്ദേഹം നടത്തിയതെന്നും രത്തന്‍ ലാലിന്റെ ഭാര്യ പൂനം ദേവിക്ക് എഴുതിയ കത്തില്‍ അമിത് ഷാ പറഞ്ഞു.

സംഘര്‍ഷത്തില്‍ മരിച്ചവരുടെ എണ്ണം 17 ആയി.ഇന്ന് രാവിലെ നാല് പേരെ മരിച്ച നിലയില്‍ കൊണ്ടുവന്നതായി ഗുരു തേജ് ബഹദൂര്‍ ആശുപത്രി അധികൃതര്‍ അറിയിച്ചു.50 പൊലിസുകാര്‍ ഉള്‍പ്പടെ 180 ഓളം പേര്‍ക്ക് പരുക്കേറ്റിട്ടുമുണ്ട്. പരുക്കേറ്റവരില്‍ നിരവധിപേര്‍ ഗുരുതരാവസ്ഥയിലാണ്.