വാടാനപ്പള്ളി: തളിക്കുളം ചന്തയില്‍ കൃഷിഭവന്റെ നേതൃത്വത്തില്‍ മൂന്ന് ദിവസം നീളുന്ന തിരുവാതിര ഞാറ്റുവേല നാളെ തുടങ്ങും. 25ന് സമാപിക്കും.
 മഴക്കാല പച്ചക്കറികള്‍, ഓണക്കാലത്തേക്കുള്ള ചെണ്ടുമല്ലി, ജമന്തി തൈകള്‍, മറ്റു പുഷ്പ-ഫല തൈകള്‍, കുരുമുളക് വള്ളികള്‍, മഞ്ഞള്‍, തെങ്ങ്, കമുക് എന്നിവയുടെ നാടന്‍ ഹൈബ്രീഡ് തൈകള്‍, ബഡ് ജാതി, ഒട്ടുമാവ് തൈകള്‍, കാര്‍ഷികോത്പന്ന ഉപാധികള്‍, കാര്‍ഷിക, കാര്‍ഷികേതര ഉത്പന്നങ്ങളുടെ പ്രദര്‍ശനം, ഗ്രാമപഞ്ചായത്തിലെ കാര്‍ഷികേതര ഉത്പന്നങ്ങളുടെ പ്രദര്‍ശനവും വില്പനയും കാര്‍ഷിക ക്ലിനിക്, കാര്‍ഷിക ലൈബ്രറി എന്നിവയും ഞാറ്റുവേല ചന്തയിലുണ്ടാകും. കാര്‍ഷികാവശ്യത്തിനുള്ള മണ്ണ്, ജലം എന്നിവ പരിശോധിക്കാനും ചന്തയില്‍ സൗകര്യമൊരുക്കിയിട്ടുണ്ടെന്ന് കൃഷി ഓഫീസര്‍ വി.എസ്.പ്രതീഷ് പറഞ്ഞു.